#Язмалар 21 сентября 2022, 09:16

Шома баса беләбез икән әле

21 сентября 2022, 09:16

Камыр да җәйдек, йон да эрләдек. Салкын кичне дәртле биюләр белән җылыттык. “Хәрәкәттә-бәрәкәт” проектының бу сезонда йомгаклау чарасы узды. Быел проект кысаларында 10 мастер-класс үткәрелде. Соңгы остаханә керәшен халык биюенә багышланды. “Татмедиа” бинасы янындагы скверда “Бәрмәнчек” дәүләт фольклор ансамбленең балет артистлары үз осталыгын тамашачыларга тапшырды.

Скопировать ссылку

Төрле тарафларда яшәүче керәшеннәрнең биюләре дә бер-берсеннән аерыла. Аларның кием-салымы һәм хәрәкәтләре дә башка милләтләрнеке белән кушылып китә. Мәсәлән, мәлки керәшеннәренең хатын-кызлар баш киеме чуашларныкына охшаган.

– Камыр җәябез, йон эрлибез, дип юкка әйтмәдем. Бию хәрәкәтләре көнкүреш белән тыгыз бәйләнештә тора. Кызганыч, бүген йон эрләп утыручылар бик аз. Бу үзенчәлекле һөнәрне бию хәрәкәтләре аша булса да, кире кайтарасыбыз килә, – диде “Бәрмәнчек” дәүләт фольклор ансамбленең балет артисты Юлия Габдрахманова.

Керәшен гүзәлләренең хәрәкәтләре салмак, йомшак, ә ир-атларныкы, киресенчә, дәртле һәм көчле. Керәшен егетләрен шләпә һәм шакмаклы күлмәк аерып тора.

– Керәшен киемнәрен музейлардан табып тектердек. Ир-атлар киеменең аерылгысыз элементлары эзәр (билбау) һәм җилән. Бүген безнең Кукмара керәшеннәре костюмында чыгыш ясадык. Төрле тарафларда яшәүче керәшеннәрнең үзенә генә хас кием-салымы бар, – диде “Бәрмәнчек” ансамбленең артисты Руслан Насыйров.

“Хәрәкәттә-бәрәкәт” проекты башкалабыз яшәүчеләренә һәм кунакларына хуш килде. Шома баса беләбез икән әле. Элек-электән сакланып килгән биюләрне яңартып, кичне күңелле һәм файдалы үткәрдек. Киләсе очрашуларга кадәр!

Илгизә Галиуллина

Кызыклы яңалыкларны күзәтеп бару өчен Телеграм-каналга кушылыгыз.

‹ ›