Шәһри Казан

Татарстанда 5 меңнән артык кешенең кызамык белән авыру куркынычы бар

Былтыр 47 илдә кызамык белән авыручы 82 меңнән артык кеше теркәлгән. Аларның 72се вафат булган. Татарстанда хәл алай ук катлаулы булып саналмаса да, сакланганны саклармын диләрме әле? Кызамыкны кисәтүнең бердәнбер юлы – прививка ясату. Ә республикада аннан баш тартучы 5 меңнән артык кеше исәпләнә.

«Татар информ» мәгълүмат агентлыгында узган матбугат конференциясендә белгечләр кызамыкны кисәтү хакында сөйләштеләр. Роспотребнадзорның Татарстан буенча идарәсе җитәкчесе урынбасары Любовь Авдонина әйтүенчә, вирус күп очракта республикага читтән керә. Былтыр мондый ике очрак аркасында Казанда, Чаллыда 12 кешегә кызамык йоккан. Кызганыч, балаларның күбесе прививка ясатмаган булган.

Реклама

Татарстан Сәламәтлек саклау министрлыгының баш инфекционисты Хәлит Хәертынов аңлатуынча, кызамык – көчле йогышлы чир, ул һава юлы белән күчә,хәтта вентиляция шахтасы юлы белән дә таралырга мөмкин. Авыруның билгеләре салкын тигәндәге кебек, тән температурасы күтәрелә, авыз куышлыгы һәм өске тын юллары ялкынсына. Бу авыруга, конъюнктивит өстәлергә мөмкин. Авыруның дүртенче, бишенче көннәрендә генә кызамыкның төп билгеләре – тәнгә тап-тимгелләр чыга башлый. Кызамык өзлегүләр белән куркыныч, еш кына үпкә ялкынсынуга китерә. Нерв системасына зыян килеп кешенең инвалид калуы мөмкин, кызганыч, үлем очраклары да бар. Олыларда авыру аеруча катлаулы уза.

Авырудан саклануның иң ышанычлы һәм бердәнбер юлы – кызамыкка каршы прививка ясату. Аны гадәттә балага бер яшьтә һәм кабат алты яшьтә ясыйлар. Шул прививка нәтиҗәсендә барлыкка килгән иммунитет кешене гомер буена авырудан сакларга сәләтле. Әлеге прививканы сырхауханәләрдә бушлай ясыйлар. Кызамыкка каршы җитештерелгән прививкалар куркынычсыз санала.

Фото: aif.ru

Нравится
Поделиться:
Реклама
Комментарии (0)
Осталось символов: