16+

Татлы бүләк тешкә сылана

Яңа ел бәйрәмнәре алдыннан әти-әниләрнең эш урыннарыннан, балалар бакчаларында һәм мәктәпләрдә, бәйрәм символы буларак, татлы бүләкләр бирелә. Игътибар күрсәтү һәрвакыт яхшы инде ул, тик моның икенче ягы да бар. Бу көннәрдә ашалган баллы конфет, печеньеның чуты-чамасы югала. Шикәр артык күп киткәч, балаларда аллергия башлануы да бар.

Татлы бүләк тешкә сылана

Яңа ел бәйрәмнәре алдыннан әти-әниләрнең эш урыннарыннан, балалар бакчаларында һәм мәктәпләрдә, бәйрәм символы буларак, татлы бүләкләр бирелә. Игътибар күрсәтү һәрвакыт яхшы инде ул, тик моның икенче ягы да бар. Бу көннәрдә ашалган баллы конфет, печеньеның чуты-чамасы югала. Шикәр артык күп киткәч, балаларда аллергия башлануы да бар.

– Быел безгә шундый сигез пакет бүләк иттеләр. Иң элек әтиләре алып кайтты. Беренче бүләк булгач, күңелләре булганчы ашадылар инде балалар. Аннан соң мондый «татлы» букчалар бер-бер артлы кайта башлагач, чамасын югалттылар. Кызыбызда аллергия башланды, бит очлары кызарды. Конфет-печеньеларны бөтенләй яшереп куярга туры килде. Узган ел да шулай берничә пакетны алып куйган идек. Эчендәге ризыклары катып беткәч, чыгарып ташладык, – ди өч бала әнисе Гөлгенә Камалиева.

Әлеге фикерне табиблар да куәтли. Доктор Регина буларак танылган табиб-блогер фикеренчә, гадәти конфет, шоколад һәм печеньеларның бернинди дә файдасы юк. Бу хәтта дөрес булмаган ашау гадәтен дә формалаштыра.

– Нәтиҗәдә, балалар үсә төшкәч, татлы ризыкларны бәйрәм һәм ләззәт алу буларак кабул итә башлый, – ди ул.

Табиб файдалы ризыклар бирү ягында. Мәсәлән, конфетны кипкән җимеш, җимеш кагы, җиләк-җимешләр алыштыра алыр иде дип саный ул.

Аннан соң, соңгы еллардагы күзәтүләрдән чыгып язганда, бүләк итеп бирелә торган конфет-печеньеларның сыйфаты да мактанырлык түгел. Күп очракта арзанлы шоколадлар белән генә чикләнәләр. Шуңа күрә җитәкчеләр татлы бүләкләр урынына уенчык, төрле тамашаларга билетлар, китаплар яки башка берәр төрле файдалы әйбер бирсәләр, күпкә яхшырак булыр иде.

 

Ә сез балаларыгызга бирелә торган күчтәнәч пакетта нәрсә булуын телисез?

Гөлназ Гыйләҗева, өч бала әнисе:
– Әти-әниләрнең эш урыннарыннан бирелә торган Яңа ел бүләкләреннән зарлана алмыйм. Конфет конфет инде ул. Балалар нәкъ менә шундый бүләк көтә бит. Тышлыгы матур булмаса, аларга кызык та түгел. Ә шәхсән үзем кирәкле бүләкләр яклы, әлбәттә. Мәсәлән, туганнарыбызның балаларына мин инде ничәнче ел рәттән уенчык биреп килдем. Үсә төшкәч, фломастер, пластилин, ягъни иҗади тупланмалар бүләк итә башладым. Әлеге күчтәнәч пакетка берәр төрле тәмле һәм шул ук вакытта файдалы әйбер дә өстим. Витаминнар, гематоген, мәсәлән. Быел кызларыма да шундый бүләк ясадылар. Мин дә, алар да канәгать калдык.

Гөлназ Шәйдуллова, ике бала әнисе:
– Балаларыбызның туган көннәре декабрь ахырына туры килгәч, кирәкле бүләкләр янына, Яңа ел атрибуты буларак, татлы конфетлар да бирәләр. Балалар барысын да ачып, бер тапкыр тешләп алдылар. Ошатмадылар.

Айгөл Аксанова, ике бала әнисе:
– Яңа елга баллы тәм-том тутырылган бүләкләр шактый җыела инде. Балаларга ашаудан бигрәк, аларны көтеп алу, ачып карау мизгелләре кызыграк. Конфет, шоколад тансык ризык түгел инде хәзер. Алар урынына файдалырак әйберләр, төрле чикләвекләр, китап, язу-сызу әсбаплары тутырылса, күпкә файдылырак һәм истәлеклерәк булыр иде.

Анна АРАХАМИЯ фотосы

Язмага реакция белдерегез

0

0

0

0

0

Реакция язылган инде

Комментарийлар

Мөһим

loading
2
X