Төзелеш, ипотека, Сабантуй һәм Конституция: бар да коронавируска бәйле

Республикада бүген яңа коронавирус инфекциясе йоктыруның 54 очрагы расланган, дәваланучылар саны 177 булган. Гомумән алганда, Татарстанда әлеге вирус йоктыручылар саны 3351 гә җитте. Саннар соңгы көннәрдә кими. Бу республикада эпидемиянең кимүенә ишарә дип кабул итәргә кирәктер. Әмма әле “җәелергә” иртәрәк.

Торак мәсьәләсе
ТР Президенты Рөстәм Миңнеханов бүген РФ Дәүләт Советының Россия Торак төзелеш һәм уңайлы шәһәр тирәлеген үстерү турындагы мәсьәлә буенча чираттагы җыелышны үткәрә.

Белгәнебезчә, пандемия төзелеш өлкәсенә дә үзгәрешләр кертте. Шуңа да киңәшмәнең көн тәртибе дә тармакка ярдәм итү мәсьәләләренә кагыла.
- Тулаем алганда, республикада 2020 елның беренче кварталы нәтиҗәләре буенча, Татарстан Республикасы Россия субъектлары арасында - дүртенче, ә Идел буе Федераль округы субъектлары арасында беренче урында тора. Быел торак-төзелеш программасы кысаларында, файдалануга тапшырыла торган торак 3 млн кв метрга якын күләмдә формалаштырылган һәм ел саен бу күрсәткеч арта гына барачак, - дип белдерде Казан Кремленең рәсми вәкиле Лилия Галимова.

Ташламалы, ягъни 6,5 процентлы ставка белән исә 474 кредит ипотекасы бирелгән. Аларның гомуми саны 1 млрд сумнан артып киткән.

Сәүдә үзәкләре, кафе-рестораннар һәм Сабан туе хакында
- Сәүдә үзәкләренең төгәл кайсы числоларда ачылачагын әйтү дөрес булмас иде. Бу уңайдан бик күп мөрәҗәгатьләр килә һәм коронавируска каршы көрәш буенча оешкан штаб та бу өлкәдә эшли, Рөстәм Нургали улы да алардан тәкъдимнәр көтә. Рәсми документ булгач, без бу хакта хәбәр итәрбез, - диде Кремльнең рәсми вәкиле. Ул шулай ук фараз кылулар белән шөгыльләнмәскә дә өндәде.

- Бу мәсьәләдә фаразлар ясау иң зур хата булыр иде. Чикләүләрне бетерү бары санитар-эпидемиологик вәзгыятьтән генә чыгып кына тормышка ашырыла ала, - ди Президентның матбугат хезмәте җитәкчесе.

Бу шулай ук Сабан туйларын уздыру һәм “Изге Болгар җыены”на да кагыла. Гадәттә "Изге Болгар җыены”Болгар халкының Ислам динен рәсми рәвештә кабул иткән көненә туры китереп, 21 майда уздырылды.

Әмма быел ул пандемия нәтиҗәсендә күчерелде һәм 6 июньдә үтәр дип планлаштырылган иде. Тик бу датада да җыен булмаячак.
- Якын киләчәктә массакүләм чаралар уздыру әлегә күздә тотылмый, - диде Лилия Галимова.

Конституция өчен ничек тавыш бирәбез?
Татарстанда Конституциягә үзгәрешләр кертү буенча тавыш бирү гадәти форматта узачак. Кремльнең рәсми вәкиле билгеләп үткәнчә, тавыш бирү вирусны таратмауны булдыру өчен барлык шартларны да үтәп оештырылачак. Бу өлкәдә республикада эш инде башланган. 

Билгеле булганча, төп законга үзгәрешләр кертү буенча тавыш бирүне РФ Президенты Владимир Путин 1 июльгә билгеләде. Ул Россия халкы өчен ял көне дип игълан ителде.

Лилия ЛОКМАНОВА

Фото: https://pixabay.com/ru/