Уртак Җиңүдән - гомум тынычлыкка

Бу акция Бөек Җиңүнең 75 еллыгына багышлап, Россия Федерациясе Оборона министрлыгы һәм Президент грантлары фонды теләктәшлегендә үткәрелә. Автойөреш “Уртак Җиңүдән- гомум тынычлыкка” шигаре астында уза.

- Автоколоннаны 1953 елда ясалган легендар ГАЗ М-20 “Победа” машинасы җитәкли. Илебез буйлап 200 метр зурлыктагы Җиңү байрагы күчермәсе белән 300 метр озынлыктагы георгиев тасмасын алып барабыз. Хәрби Көчләр чиркәвенә “Казанская божья мать - Державный покров” иконасын тапшырачакбыз. Түбән Новгородта колоннага тагын 20 машина һәм “Ночные волки” мотоклубы кушылачак, - дип таныштырды автойөреш проекты авторы, Волгоград өлкәсенең “Яшьармиячеләр” төбәк штабы җитәкчесе Павел Григорьев.

Автойөреш Владивостокта Попов утравыннан башланып киткән, ватанпәрварләр колоннасы Казанга кадәр инде 8 мең километрдан артык ара узган. 

– Геройлар бүген дә бар. Якташыгыз - очучы Марат Әхмәтшин моңа мисал. Күп милләтле һәм конфессияле илебездә тынычлык һәм дуслык булсын. Казанга Хезмәт даны шәһәре исеме бирелгәнлеген беләбез, бу – тыл хезмәтчәннәренә хөрмәт билгесе. Казанны котлыйбыз! – диде Петр Григорьев.

“Яшьармиячеләр” хәрәкәтенең Татарстан төбәк штабы җитәкчесе, генерал-майор Александр Бородин автойөрешнең бик әһәмиятле чара булганлыгын искәртте.

– Татарстанда яшьармиячеләр 20 мең. Хәрбиләрнең каберлекләрен чистартып-карап торабыз. Татарстаныбыз белән горурланабыз. Миллионнарча корбаннар бәрабәренә яуланган Җиңүнең кадерен белик. Күкләребез аяз булсын, безгә сугыш кирәкми, – диде Александр Бородин.

Автойөреш ахырында Мәскәүдә түгәрәк өстәл утырышы үткәрү планлаштырылган. Аңа элекке Советлар Союзының союзниклары – җиде ил вәкилләре чакырылган.

Автор фотолары.