Ваһапов фестивале йолдызлары концерты: дуслык, мәхәббәт һәм гыйшык-мыйшык (ФОТОЛАР)

Җырчылар аерым-аерым да, дуэт һәм квартет белән дә чыгыш ясады. Алар тамашачыларга хит булып әйләнгән җырларын да, яңа иҗат җимешләрен дә тәкъдим итте.  

Оештыручылар әйтүенчә, Гөлназ Сәфәрова сценарийны реаль вакыйгаларга нигезләнеп язган. Ягъни тормышта Азат белән Ранис ничек бер-берсен шаяртып яши, концертта да шуңа басым ясалды. 

-    Җырчылар арасында көндәшлек кенә бар, дуслык була алмый, дип уйлаучылар ялгыша. Чынлыкта без Азат белән дуслар. Бергә ял итәбез, кунакларга йөрешәбез, бер-беребезгә киңәшләребезне бирәбез. Дүрт ел эшләү дәверендә, Аллага шөкер, ямьсезләшкән булмады. Соңгы елда Азатның вокал мөмкинлекләре тагын да ныграк ачылды. Мин аның өчен шатланам гына, - диде Ранис Габбазов сәхнә артында “ШК” журналисты белән аралашкан вакытта.   
Ранис бер ай элек әти булган иде. Аның Тимерлан исемле улы туды. Концерт вакытында әлеге вакыйга да телгә алынды.  

-    Тормышымның өченче этабына аяк атладым, дияргә була. Балам туу мине бик бәхетле итте, әле һаман да шул рәхәт хисләр дулкынында яшим. Гастрольләрдән дә өйгә улымны сагынып, ашкынып кайтам. Матур итеп яшәү, тырышып эшләү өчен стимул да артты. Гаиләм, балам, туганнар, дуслар минем уңышларымны күреп сөенсеннәр иде дип, тагын да ныграк тырышлык куеп иҗат итә башладым, - диде Ранис.  

Дүрт җырчы арасында иң авыры Раниска булгандыр әле, чөнки бу көнне ул сәхнәгә югары температура белән чыкты. Әмма аңа да карамастан, тере тавышка җырлап, “Кара урман”ны да акапеллага башкарып, тамашачыларның кайнар алкышларына күмелде.   

Айсылу Габдиновадан исә күпләр: “Кайчан кияүгә чыгасың?” – дип кызыксыналар икән.

-    Кияүгә чыгасы килү хыялыннан бигрәк, сораучыларга: “Кияүгә чыктым”, - дип җавап бирәсем килү теләге көчлерәк. Шуңа багышлап “Өйлән, давай!” дип аталган җыр да иҗат ителде. Дөресен генә әйткәндә, һаман саен шәхси тормышыма кагылышлы сораулар ишетү бик ялкыта. Кайберәүләр хәтта хәл сорашыр урынга, “Кайчан кияүгә чыгасың?” – дип сорыйлар. Концертлардан соң очрашырга тәкъдим итүчеләр күп. Әмма ни сәбәпледер аларның күбесе өлкән яшьтәге абыйлар була. Шуңа күрә әлегә күңелемә якын кешене очратмадым. Ә минем “кияүгә чыккан” дигән сүз өчен генә гаилә корасым килми. Үз янымда акыллы, төпле,  тырыш, юмор сөючән татар кешесен күрергә телим, - диде Айсылу.

Җырчы быел музыка мәктәбендә вокал дәресләре бирә башлаган икән.
-    Бу минем өчен яңа тәҗрибә. Башкаларны укытканда үзем өчен дә яңалыклар ачам, - диде ул.  

Ваһапов фестиваленең ике йолдызы - Азат Абитов белән Гөлсирин Абдуллина арасындагы мәхәббәт турында ялкаулар гына язмый калды бугай инде. Концертта да әлеге парга аерым игътибар бирелде. Дуэтларын да тамашачылар кайнар алкышлар белән каршы алдылар.

Әллә концерт алдыннан дулкынлануы көчле булдымы, әллә башка сәбәптәнме, безнең сорауларга Азат: 

-    Концерт өчен борчылгач, барысын да искә төшереп бетерә алмыйм шул. Әгәр ялгышмасам, Гөлсирин белән егет-кыз буларак ярты ел очрашып йөрдек. Тик әлеге этапта безнең өчен иҗат мөһимрәк һәм без аның белән күбрәк эш мәсьәләсендә аралашабыз, - дип кенә чикләнде. 
Һәм яшьләр шулай да очрашамы, юкмы, дигән сорау ачык калды.       

Концертта махсус алып баручы чакырылмаган иде. Егетләр-кызлар әлеге миссияне үзләре башкарып чыкты. Әйтергә кирәк, бөтен җырчыга да матур, күңелгә ятышлы һәм табигый итеп сөйләү сәләте бирелмәгән. Җыр арасында сөйли торган сүзләре күп булмаса да, бу җырчылар өчен аерым бер җаваплылык өсти торган эш. Миңа калса, алып бару, сүз сөйләү осталыгы барысыннан да бигрәк Айсылуга бирелгән. Моңа, әлбәттә, җырчының телевидениедә алган тәҗрибәсе дә, моңа кадәр концертлар алып баруы да ярдәм иткәндер дип уйлыйм. 

Ваһапов фестивале җырчылары яңа концерт программалары белән Түбән Кама, Чаллы тамашачылары каршында сынау узган иде инде. Казанлылар да яратып кабул итте. Алдагы көннәрдә алар шушы ук программаны республиканың башка район-шәһәрләренә дә алып чыгарга планлаштыралар. Шулай ук, 25 февральдә Казанда өстәмә концертлары да узачак.   
 

Александра Живушкина фотолары