«Васыятьнамәне язмыйча йокларга ятмагыз»
Заманча технологияләр алга киткән чорда яшибез. Ярый әле интернет, гаджетлар бар. Яшьләр бигрәк тә нәтиҗәле куллана аларны. Кайвакыт хәтта лайклар белән генә яшиләр кебек. Әмма яңа технологияләр никадәр генә мавыктыргыч булмасын, тормыш кыйммәтләре турында да онытырга ярамый.
Заманча технологияләр алга киткән чорда яшибез. Ярый әле интернет, гаджетлар бар. Яшьләр бигрәк тә нәтиҗәле куллана аларны. Кайвакыт хәтта лайклар белән генә яшиләр кебек. Әмма яңа технологияләр никадәр генә мавыктыргыч булмасын, тормыш кыйммәтләре турында да онытырга ярамый.
Россиянең Мөселман эшмәкәрләр ассоциациясе президенты Айдар Шаһимәрдәнов сүзләренчә, интернетның бөтен мөмкинлекләрен оста кулланган бүгенге яшьләр күрше урамда гына яшәүче туганын да белмәскә мөмкин. Әхлакый тәрбия турында да онытмаска иде, ди ул.
Әлеге максаттан «Гаилә» мәчете, Татарстан Мөселманнары диния нәзарәте теләктәшлеге, ЗАГС идарәсе, архив эше буенча дәүләт комитеты һәм Россия мөселман эшкуарлары ассоциациясе белән берлектә, «Васыятьнамә – киләсе буыннарга әйтер сүз» һәм «Нәселебез шәҗәрәсе» дигән конкурслар уздырырга булган. Халыкка васыятьнамәнең нәрсә икәнлеген, аның әһәмиятен аңлату һәм язу үрнәкләрен күрсәтү максатын куйган беренче бәйге узган елны да оештырылган булган. Актуаль тема буларак, аны кабат үткәрергә булганнар. «Гаилә» мәчете имам хатибы Рөстәм хәзрәт Хәйруллин васыять язу эшен соңга калдырмыйча эшләргә кирәклеген искәртә.
– Пәйгамбәребез Мөхәммәд (с.г.с.) бер хәдисендә: «Васыятьнамәне язмыйча йокларга ятмагыз», – ди. Йоклау ул – бәләкәй үлем. Иртән уяна аласыңмы, юкмы икәнен берәү дә белми, – дип сөйләде ул матбугат очрашуында.
Хәзрәт әйтүенчә, балага үтемле итеп язып калдырган васыятең аны гомер буена озатып барачак. Чит кешеләр аңа күпме генә үгет-киңәш бирсә дә, алар барыбер әти-әни нәсыйхәтен алыштыра алмый. Алар сүзе – бала өчен изге сүз, ди Рөстәм хәзрәт.
Бездә, гадәттә, васыятьнамә ике төрле формада языла. Берсе матди байлыкны күз уңында тотса, икенчесе – үгет-нәсыйхәт, киләчәк буынга әйтер сүз булып языла. Бәйгедә нәкъ менә шул икенче формада язылганына басым ясала. Бәйгегә эшләр 16 февральгә кадәр кабул ителә. Конкурс язмаларын «Гаилә» мәчетенә тапшырырга яки gailya.mechet@gmail.com электрон почтасына җибәрергә була.
Туганлык мөнәсәбәтләрен ныгыту максатыннан нәсел тамырын барлауны, гаилә тарихлары белән кызыксынуны алга сөргән «Нәселебез шәҗәрәсе» бәйгесе дә кызыксыну уятыр дигән фикердә тора оештыручылар. Аларча, һәр кеше үзенең нәселен белергә, белмәсә – өйрәнергә тиеш. Конкурс эшләре 1 майга кадәр кабул ителә.
Бәйгене оештыру комитеты рәисе Сиринә Шаһимәрданова үзе төзегән нәсел шәҗәрәсен дә алып килгән иде. Анда нәселендәге 250 кеше кергән, , барысы ун буын килеп чыккан. Борынгырак буын вәкилләрен ул архивларга мөрәҗәгать итеп тапкан. Бу эш архив комитетында җайга салынган, ди ул.
Дилбәр Гарифуллина.
tatar-inform.ru
Комментарийлар