Шәһри Казан

Вирусы бетәр, дөньясы үзгәрер

Иртәме-соңмы, коронавирус җиңелер, аңа хәтле әле күпләребез битлекләр тегәргә өйрәнеп, дөньякүләм куркынычка җитдирәк тә карый башларбыз.

 Тора-бара тормыш элеккеге хәленә кайтыр кайтуын, әмма пандемия калдырган эзләр тиз генә  юкка чыкмас һәм дөнья бераз үзгәрер. Көчсез якларны ачыклау өчен зур масштабтагы бәла белән күзгә-күзгә очрашу гына кирәк, ул хата-кимчелекләрне тиз арада күрсәтеп бирә.  

Карантинга дип җибәрелгән россиялеләрнең табигатькә чыгып кәеф-сафа коруына күрше-тирә аптырамый – бездәге “авось”тан алар хәбәрдар. Әмма үзләрен шулхәтле югары мәдәниятле, оешкан, тырыш, тук һәм бай дип уйлаган европалылар әлегә күбрәк зыян күрә. Европа союзы – бүген иң уңышлы глобальләшү проекты, икътисади яктан көчле булган Франция белән Германия аның әйдаманы булырга теләп бер-берсенең җилкәсенә төртешә.

 Наполеон ватанында бүген 37 мең кеше коронавирус йоктырган, Париж бу куркынычны бетерү нисбәтеннән авырулар өчен өстәмә урыннар булдырган, Кытайдан 1 миллиард битлек кенә кайтартылган. Әмма бу эшләрнең бөтенесе башкалар исәбенә ирешелә, югыйсә союз булгач, барысы да тигез хокуклы булырга тиеш.

Күршеләре Италия – Европа союзында бүген коронавирустан иң күп зыян күрүче ил. Ә аңа, үзләренең эчке мәшәкатьләре булуга карамастан, ярдәмгә ашыгучылар – Россия белән Кытай. Европа союзы бу адымга рәхмәтле булырга тиеш кебек, әмма НАТО белән Парижга бу ошамаган. Сәеррәк бердәмлек бу – үзең котыл, күршең үлсен, шул ук вакытта аңа башкалар да ярдәм итмәсен. Европа өчен бәлки нормаль күренештер бу, анда яшәмәгәч, ничек аңлап бетерәсең инде аларны.  

Эпидемия бетәр ул, берләшеп җиңәрләр аны, әмма аннан соң кайбер нәрсәләргә башкача караш булачак. Союздагы дәүләтнең эчке суверенитетын сакларга һәм ныгытырга омтылучыларның күбәеп китәсенә дә аптырыйсы түгел. Европа союзын таркатырга диючеләр дә булыр әле.

Эпидемия тарала башлау белән тиз арада хәлиткеч чаралар күргән Чехия, Польша, Балтыйк буе илләренә “кече туганнар”га булган мөнәсәбәт булмас инде  хәзер, әлегә хәтле аларны ничек яшәргә өйрәтүче “акыллы” французлар белән немецлар бәлки җае чыккан саен акыл сатмый башларлар? Таркалмаган очракта да, бүген килеп туган мәшәкатьләрне бетерми торып, союз киңәер дип көтәсе юк әлегә. Бу мәсьәлә безне борчымый, шулай ук Украина, Молдова, Грузия дә әлегә борчымас кебек. 

Коронавирусны җиңү өчен демократия кулаймы, әллә диктатурамы – әлегә әйтүе кыен. Европа демократиясенең ничегрәк көрәшкәнен күрдек, тагын да төгәлрәк әйткәндә – ул үзенең нәтиҗәсезлеген күрсәтте, ә менә Сингапур белән Кытай диктатурасы бу өлкәдә уңышка күбрәк ирешә кебек. Ләкин диктаторлар алдарга ярата, Кытай алдап, яшереп ятмаган булса, бәлки куркыныч иртәрәк бетәр иде. 

Бездә исә хәлләр башкачарак, әллә нинди тыюлар булганда да, халык аларны әйләнеп узу мөмкинлеген эзләячәк. Һәркем үзе эзләгәнгә юлыкканчыга хәтле шулай булыр инде ул. Ток-шоуларда экспертлар авызыннан чәчелгән төкрек тә, читләрне таң калдырырлык заманча хәрби техника да вирустан коткарып кала алмаганын уйлап, кайбер нәтиҗәләр ясалмый калмас: адәм баласына беренче чиратта гади генә саклану чаралары кирәк, эпидемияне мылтыктан атып бетереп булмый. 

 

 

 

 

Реклама

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: