Яңа ел каникулларында нишләргә?

- Россия шәһәрләре арасында Казан кунакчыллык буенча рейтингта беренче өчлеккә керә. Кунакханәләр, шулай ук шәһәр читендәге 19 турбаза әзерлектә. Казан белән генә чикләнмичә, Арчадагы “Кыш Бабай һәм Кар Кызы” резиденциясенә, Кукмарадагы, Тәтештәге, Кама Тамагындагы музейларга барырга була, аларда Яңа ел ял программасы булдырылган. Оренбург – Казан –Йошкар-Ола – Самара туристлык маршрутында йөреп кайтырга мөмкин. Казаннан туры авиарейслар Новокузнецкка оча, анда янәшәдә генә Шерегеш тау шуу курорты. Иркутск шәһәренә очсаң, Байкал күленә дә ерак түгел, - диде Хөкүмәт йортында узган брифингта Татарстанның туристлык комитеты рәисе Сергей Иванов.

Яңа ел яллары көннәрендә театрлар, музейлар эшли. Казанда 5а трамвай маршрутында “театр” итеп җиһазланган бер трамвайдада спектакль карап барырга була хәтта.
- Казан Кремле территориясенә куелган чыршы 22 декабрьдә ачыла. Аңа беренче булып, мобилизациягә алынган гаиләләрдәге 1-4 сыйныфлар укучыларын җыябыз. Әлеге исемлектәге 2,2 мең балага Кремль территориясендәге чыршы янында бәйрәм оештырыла. “Әкият” курчак театрындагы спектакльгә дә мобилизациягә алынган гаиләләрдән 200 бала чакырулы. Болгарда, Зөя утрау-шәһәрлегендә, Иске Казанда, Алабугада, Яңа Кырлайда мәдәни чаралар үткәрелә. Мәдәни чараларның күбесенә “Пушкин картасы” белән дә кереп була, - диде республиканың мәдәният министры Ирада Әюпова.

Казандагы “Татнефть-Арена” Спорт сараенда 25 декабрьдә Республика Чыршысы үткәрелә.
- Төп Чыршы бәйрәмендә 8,5 мең укучы катнашачак, шуларның 2,2 меңе – мобилизациягә алынган кешеләрнең балалары. Әгәр һава торышы начарланып китсә, Республика Чыршысына килгән балалар өчен шәһәр яны лагерьлары әзерләп куелды. Мобилизациягә алынган кешеләрнең балаларына, шулай ук Лисичанск шәһәре балаларына китаплар һәм уку кирәк-яраклары җыю акциясе бара, - диде республиканың яшьләр эшләре буенча министры Тимур Сөләйманов.

Татарстандагы мәктәпләрдә быелның 28 декабреннән киләсе елның 8 гыйнварына кадәр – кышкы каникул.
- Яңа елны иң көтеп алучылар, әлбәттә инде, балалар. Татарстан Хөкүмәте тарафыннан 18 яшькә кадәрге ятим, авыр тормыш шартларындагы, авыру, коррекция мәктәпләрендә белем алучы балаларга Кыш бабай белән Кар кызыннан 15 мең бүләк тапшырыла, - диде республиканың мәгариф һәм фән министры Илсур Һадиуллин.

Ун муниципаль берәмлектә 93 мәктәп яны лагеры оештырыла. Каникул вакытында театрларда балалар өчен спектакльләр күрсәтелә, моннан тыш, төрле конкурслар һәм олимпиадалар үткәрелә. 

Республиканың спорт министры урынбасары Илдар Садриев әйткәнчә, ял көннәрендә спорт корылмалары эшли.
- Декабрь ахырында “Ак Барс” командасы “Металлург” һәм “Түбән Кама” хоккей клублары белән очраша, - диде ул.

Республиканың мәгариф һәм фән министры Илсур Һадиуллин каникул көннәрендә ата-аналарны үзләренең балаларының иминлегенә игътибарны киметмәскә, балаларны ялгызларын гына елга-күл буйларына җибәрмәскә чакырды.