“Әйе” диярме? Кияүгә чыгарга тәкъдимнең ясауның берничә ысулы

Шугалакта тәкъдим ясау
Әгәр дә сезнең сөйгән ярыгыз тимераякта шуарга ярата икән, тәкъдимне нәкъ менә шугалакта ясарга була. Сез шугалакны арендалап, яраткан кешегезгә онытылмаслык романтик кич ясый аласыз. Әмма мондый тәкъдим өчен бина эчендәге шугалакны арендаларга туры киләчәк. 

“Тәкъдимле” маршрут
Сөйгән кызыгызны кичке якта саф һава сулап керергә чакырыгыз. Йөргән юлларыгызны картада билгеләп барыгыз. Азактан шушы картаны сөйгән кызыгызга күрсәтегез, анда төп сүзләр булачак. Бу идея өчен маршрутны алдан уйлап, әзерләп куярга кирәк. 

Фотобудкада тәкъдим
Булачак тормыш иптәшегезне фотобудкага чакырыгыз. Төрле фотосурәтләр ясаган арада белдертмичә генә йөзекне алып, аңа тәкъдим ясагыз. Мондый тәкъдим истәлек булып фотосурәтләрдә дә калачак.

“Татлы” тәкъдим
Әгәр дә сөйгән кызыгыз тәм-томнарны үлеп яратса, аңа торт яки печенье пешерегез. Ул сезнең кондитерлык талантларын мактаган арада тәкъдим ясагыз. Үзегез мондый эшкә алынырга курыксагыз, профессиональ ярдәм сорарга оялып тормагыз.

Романтик фильмдагы тәкъдим
Мәхәббәтегезнең яраткан киносыннан сценарийны чынга ашырыгыз. Ул үзен романтик тарих героинясы итеп хис итсен. Иң кульминацион ноктада аңа тәкъдим ясагыз. 

Әлбәттә тәкъдим ясауның төрле юллары бар. Монда яраткан кызыгызның хобби, яраткан шөгыльләреннән чыгып эш итәргә кирәк. Һәм тәкъдим ясау артык купшы да булмасын. Һәрбер нәрсәнең чамасы бар. Үзегезнең финанс мөмкинлегенә карап та тәкъдим ясауның шәп ысулын сайларга була.

Алсу Мансурова әзерләде