Бу кышта ничек киенергә?

Алдагы ике айда мода буенча киенү өчен киңәшләрне тизрәк куен дәфтәренә язып алырга ашыгыгыз. Әлеге җаваплы эштә безгә ярдәмәгә стилист Лилия Тимирова килер!

– Бу кышта нинди өс киемнәре модада: куртка, пәлтә, тун...?
– Шул ук пуховик, куртка, пәлтә, тун, дублёнка модада кала бирә. Мөһим момент – актуальлегенә игътибар итәргә кирәк. Киемнең кысып тормаган, артык кирәкмәгән бизәкләрсез, язуларсыз булуы шарт.  Шул очракта алар образдагы башка предметлар белән “бәхәскә” килмиячәк, бер-берсенә ятышлы торачак. Төрле туннарга аеруча игътибар итәргә тәкъдим итәр идем. Йоны чынмы, ясалмамы – анысы мөһим түгел. Алар озын да, кыска да булырга мөмкин, төсләренең төрле булуы да ихтимал.

– Нинди төстәге өс киемнәрен сайларга һәм сайламаска? 

– Аерым бер төсне читкә куеп “рәнҗетәсем” килми. Кешегә килешә, аның йөзен ача икән, мин бар төскә дә “әйе” дим. Бер өс киемендә әллә ничә төс булганын яратмыйм. Бик сирәк очракта гына бу күренеш “бай” һәм зәвыклы күренә.

– Нинди аяк киемнәре актуаль? 
- Аяк киемнәре рәтендә шул ук шнурлы йә шнурсыз ботинкалар. Алар күннән дә, замшадан да булырга мөмкин. Биек тигез табанлы сапогилар бик тә актуаль. Иң мөһиме – балтырлары кысып тормаска тиеш. Кечкенә нечкә үкчәле сапогилар исә шулай ук һаман да безнең белән – алар итәк / күлмәкләр белән бик нәфис күренә, кызлар.

– Бу кышта, һичшиксез, нинди хаталар ясарга ярамый? 
–  Хата дип әйтәсе килми инде моны, ләкин элеккеге зәвык белән киенүне туктататырга кирәк, дип уйлыйм. Кысып торган джинс / күн чалбар белән тар  курткалар кию матур күренеш түгел. Хәзер мода буенча мәгълүмат шундый күп – киенергә өйрәнү бер дә авыр түгел (һәм монда сүз акча турында бармый (көлә).

– Нинди баш киемнәре тәкъдим итәсез?
– Баш киемнәренә килгәндә, помпон белән, язулы-сызулы, бик юка тукымадан тегелгәннәрен урап узарга киңәш итәм. Уртача калынлыктагы гади бәйләм шапкалар һәрвакыт актуаль. Шулай ук беретлар бик матур: күн, фетр тукымадан. Чепчиклар да актуальлеген югалтмый әле. Аларны кемдер ярата, кемдер бөтенләй күрә алмый.