Казанда «Дуслык кубогы - Дуслык» бөтенроссия хоккей турниры старт алды

"Төрле конфессия вәкилләре катнашындагы аерым матчларны без элек тә уздырдык. Һәм без моны дуслык, тынычлык, мәхәббәт бәйрәме итәргә һәм турнирны оештырырга булдык, - дип билгеләде ТР хоккей федерациясе вице-президенты Андрей Рябов.
Ул мондый турнирны уздыру турында игълан иткәннән соң, шундук бөтен Россиядән дистәләгән гариза керде, дип тә өстәде.
Турнирны хоккей популярлаштыру һәм тынычлыкны, дини конфессияләр арасында дуслык һәм татулыкны ныгыту өчен үткәрәләр.
"Бу турнирга озын гомер телим һәм ул ел саен, шулай ук матур һәм тамашачылар тулы залларда үтсен", - диде Салават һәм Кумертау  епискобы Николай.
Дини конфессияләр арасындагы дуслыкка багышланган турнир Туган телләр һәм халыклар бердәмлеге елында уздырыла, дип билгеләп үтте Татарстан мөфтие урынбасары, Кол Шәриф мәчете имамы Илфар хәзрәт Хәсәнов.
«Спорт - берләшү, бөтен халыклар арасында дуслыкны һәм үзара аңлашуны ныгытуның мөһим чарасы, ә безнең очракта конфессияләр белән дә», - диде имам.
Татарстан өчен төрле дин вәкилләре катнашында спорт ярышлары уздыру традициягә әйләнде, дип йомгак ясады Илфат хәзрәт Хәсәнов.
Турнирның беренче матчында Казанның Духосошест гыйбадәтханәсе каршында оештырылган "Добрыня" һәм "Дмитрий Донской" командалары, Салават шәһәре  епархиясенең яшьләр ирләр җыелма командасы очрашты.
Очрашу Казан командасы файдасына 11:3 исәбе белән тәмамланды. Ул Казан православие гимназиясенең тәрбияләнүчеләреннән, ата-аналардан һәм мәхәллә кешеләреннән торды. Команда составында капкага алка кертә алган ТР хоккей федерациясе вице-президенты Андрей Рябов та уйнады.
"Уен тулысынча безнең "Дуслык" турниры атамасына туры килде. Әмма шул ук вакытта ул яхшы дәрәҗәдә һәм шактый кырыс үтте", - диде Рябов.
Турнирда шулай ук православие храмнары настоятеле һәм мәчет имам-хатыйбларыннан җыелган «ОРЯВВО», Казан югары танк училищесын тәкъдим иткән «Т-26», ТР Югары Суды вәкилләреннән торган «Фемида» командалары катнаша.
Иртәгә  Раифада финал булачак.