Киләчәктә дә бергә булыйк

Ел саен Татарстаннан читтәге төбәкләрдә нәшер ителә торган басма мөхәррирләре Казанда җыела. Узган елга йомгак ясап, «Без - бергә» газетасының эшчәнлегенә бәя бирә, киләчәккә бурычларны билгелиләр. Быел да «Тат­медиа» матбугат һәм массакүләм коммуникация­ләр респуб­лика агентлыгы җитәкчесе Ирек Миңнәхмәтов мөхәррирләр белән очрашты.

- «Без-бергә»нең го­муми тиражы 83 мең данә. Әлеге басма Татарстан белән Россия регион­нарында яшәүче милләттәшләребез арасында мәгълүмати күпер булып тора, читтә яшәүче татарларны берләштерә. Киләчәктә дә «Без - бергә» газетасы тирәсенә тупланып, телебезне, милләтебезне кадерләп, саклап, яратып яшәсәк иде, - диде ул кунакларга.

«Без - бергә» кушымтасы Татарстанда басылып килүче «Шәһри Казан» газетасы редакциясендә әзерләнә. Әлеге газеталарның редакторы Гөлнара Сабирова исә мөмкин булган кадәр «Без - бергә»не камилләштерергә, яңартырга, сыйфатлырак итәргә тырышулары турында искәртте.

Очрашуда иң истәлек­ле вакыйга ул - яңа гына табадан төшкән «Без - бергә» китабын тәкъдим итү булгандыр. Китап проекты авторы - Ислам Әхмәтҗанов. Төзүчесе һәм мөхәррире Мансур Мортазин исә:

- Журналистлар бүгенге көн вакыйгаларын киләчәк буынга җиткерү өчен зур көч куялар. Лә­кин аларның башкарган хезмәтләре тиешенчә бәя­ләнми. Татар вакытлы матбугатының тарихын чагылдырган басмалар да юк диярлек. Без әзерләгән «Без - бергә» китабы шул бушлыкны ту­тырырга ярдәм итәр дип уйлыйм. Монда Россия­ төбәкләрендә нәшер ителүче 22 татар басмасының тарихы, бүгенге хәле турындагы язмалар урын алган. «Без - бергә» - уникаль проектларның берсе. Ул алга таба да яшәсен иде, - диде.



Очрашуда шулай ук газетаның электрон вариантын эшләү турында фикерләр яңгырады. Юбилярларны котлап, ис­тәлекле бүләкләр тап­шырылды. Ахырдан «Эт­ник­ара журналистика ка­гый­­дәләре» дигән семинар да оештырылды.