Коммерциячел булмаган оешмаларга ярдәм чарасы

Гаризалар 20 майдан башлап 3 июльгә кадәр кабул ителә.

–  Россиядә 2024 ел – Гаилә елы, шунлыктан, гаиләләргә ярдәм темасына проектлар күп тәкъдим ителер, дип уйлыйм. Коммерциячел булмаган оешмалар өлкәннәргә, авыру балаларга ярдәм, балалар тәрбияләү, тәҗрибә уртаклашу темаларына проектлар тапшыра ала. Безнең максат – һәр районда социаль эчтәлекле эшчәнлек юнәлешле коммерциячел булмаган оешмалар булдыру, – диде Татарстан Республикасы Иҗтимагый палатасы рәисе Зилә Вәлиева.

Татарстаннан белгечләр бу җәйдә Луганск Халык Республикасына, шулай ук Донбасс Халык Республикасына барып, иҗтимагый оешмаларга ярдәм күрсәтергә әзерләнә.

– Россиянең яңа 4 төбәгендә дә татар иҗтимагый һәм дини җәмгыятьләре эшли. Алар белән элемтәләр бар. Россия төбәкләрендәге татар җәмгыятьләре милли мәдәниятне үстерү буенча Татарстан Республикасы Рәисе грантлары конкурсында катнаша ала, – диде Бөтендөнья татар конгрессы Башкарма комитеты җитәкчесе урынбасары Ирек Шәрипов.

“Социаль эчтәлекле коммерциячел булмаган оешмаларга теләктәшлек буенча республика ресурс үзәге” автоном коммерциячел булмаган оешма директоры Зөлфия Сафина таныштырганча, Татарстанда 6 мең иҗтимагый оешма теркәлгән, шуларның 1,5 меңе социаль эчтәлекле эшчәнлек үткәрә.

– Районнарга чыгып та, онлайн рәвештә дә курслар оештырабыз. Коммерциячел булмаган оешмалардан конкурска 14 проект керде инде, – дип, оешмаларны активлыкка чакырды Зөлфия Сафина.