Ләйлә Фазлыева: «Бездә патриотлык һәм геройлык геннарга салынган»

Мәскәүнең «Память поколений» Хәйрия фонды тәкъдиме белән эшләнгән күргәзмәне киләсе елның 7 гынварына кадәр күрергә мөмкин булачак.

Һәр фотоның үз тарихы бар. Әмма бу тарихлар һич кенә дә кызгану, җәлләү хисләре уятмый, ә киресенчә, көчле рух, матур тән турында сөйли. Фондның башкарма директоры Катерина Круглова:

- Бүген бөтен кеше дә, ветеран, дигәч, өлкән яшьтәге кешене күз алдына китерә. Ә бит алар арасында хәзерге заманда хәрби хәрәкәтләрдә катнашкан яшь егет-кызлар да бар. Әлеге эшләрдә физик мөмкинлекләре чикләнсә дә, актив тормыш рәвеше алып баручы ветераннар шактый. Әлеге геройлар арасында параолимпия уеннарында көмеш медальләр яулаучылар да бар. Кешеләр ветераннарның көчле, кызыклы һәм максатчан икәннәрен белсеннәр, - ди.

Моннан тыш, күргәзмәнең тагын бер максаты бар. Ул да булса, яшьләрне мөмкин кадәр күбрәк җәлеп итү. Ветераннарны фотога төшергән Данил Головкин һәм Ольга Тупоногова-Волкова - бүгенге көндә безнең илнең фэшен индустриясендә иң танылган фотографлар. Ә Криста Судмалис - ялангач ир-атларны гына фотога төшерә. Ул аларга сәнгать объекты итеп карый, ди оештыручылар.

Россиядә 650 Герой яши. Әлеге проектта шуларның 33е генә катнашкан. "Геройларны озак үгетләргә туры килмәде. Шулай да Криста Судмалис белән эшләячәк ир-атлар белән озаграк сөйләштек. Аяксыз булсалар да, аларның матур икәнлекләрен күрсәтебез килде. Мәсәлән, ике аяксыз Костя Скороходов бүген дә ФСБда эшли. Аның җитәкчесеннән бик озак ризалык алырга туры килде", - ди Катерина Круглова.

Әлеге 33 ветеран арасында Татарстаннан Алексей Кораблев та бар. Россия Герое Төньяк Кавказ контртеррористик операциясендә катнашкан. Хәрби бирем үтәгән вакытта Алексей иптәшләре белән бергә ут чолганышында кала. Командир белән бергә ул башка сугышчыларны каплап кала, соңыннан үзе дә котыла. Шунан соң бик каты яраланган икенче сугышчыны бер тәүлек буена күтәреп бара. Әлеге батырлыгы өчен 21 яшьлек егетне "Золотая Звезда" медале белән бүләклиләр.

- Әлеге фотокүргәзмәдә оештыручылар ил геройларын бөтенләй яңача ачкан. Бездә патриотлык һәм геройлык геннарда салынган. Бирегә килгән балалар да начар уйларга бирелмәячәк. Әлеге күргәзмә буенча узганда, зур кыйммәтләр турында уйлана башлыйсың. Герой булганнан соң тормыш дәвам итә. Әлеге эшләр мөмкинлекләре чикле кешеләрне дә алга таба көрәшергә, тормышны яратырга бер этәргәч булып тора, - ди Президент ярдәмчесе Ләйлә Фазлыева.

Ә менә Наталия Фишман сүзләренчә, искиткеч югары сыйфатта эшләгән фотолар дүрт-биш тапкыр кире борылган.
- Безнең максат - аларда бернинди дә үз-үзеңне "сындыру", өзгәләнү хисләре булдырмау иде, - ди ул.