Марат Әхмәтов: «Куәтле техника сатып алу сан ягыннан кимүне беркадәр каплый»

- Авыл хуҗалыгы - икътисадның мөһим тармагы. Ил агротармагын, балыкчылыкны чит илләр технологияләренә бәйлелектән чыгарырга кирәк, - дип өндәмә ташлады комитет рәисе Таһир Һадиев.
Республиканың авыл хуҗалыгы һәм азык-төлек министры Марат Әхмәтовның да максаты бу.

- Авыл хуҗалыгы машиналары булу көндәшлеккә бирешмәүчәнлекне тагын да ныгытачак, - диде Марат Әхмәтов. - Республика авыл хуҗалыгына ярдәмгә ел саен ике миллиард сум акча бирелә. Соңгы өч елда 1907 берәмлек авыл хуҗалыгы техникасы сатып алынды. 2008 елларда ел саен шуның кадәр техника кайта иде. Хәзер бәяләр кыйммәтләнде. Куәтле техника сатып алу сан ягыннан кимүне беркадәр каплый, әлбәттә.

Татарстандагы эре предприятиеләр авыл хуҗалыгы машиналары җитештерү белән шөгыльләнсен өчен дәүләт ярдәме һәм кызыксындыруы булырга тиешлеген искәртте министр Марат Әхмәтов. Татарстан - авыл хуҗалыгы машиналары җитештерүдә шактый тәҗрибә туплаган республика. «Агромастер» предприя­тиесендә - чәчкечләр, тагылма арбалар, Т-360 тракторы, Буа машина заводында - культиваторлар, Чистайда - ашлык чистарткычлар, Лениногорскида - печән җыйгычлар, «Казаньсельмаш» заводында мелиорация машиналары җитештерелә.

Республиканың сәнәгать һәм сәүдә министры урынбасары Алмаз Хөсәенов әйткәнчә, узган ел Татарстанда 1300 берәмлек авыл хуҗалыгы машиналары эшләп чыгарылган. «Татарстандагы авыл хуҗалыгы машиналары җитештерүче предприятиеләргә быел Россия Федерациясе бюджетыннан 9,9 миллиард сум биреләчәк», - дип ышандырды Алмаз Хөсәенов.

Республиканың икътисад министры Артем Здунов эшкуарларны авыл хуҗалыгы техникасы җитештерүдә бергәләшеп эшләргә чакырды, министрлык тарафыннан ярдәм булачагына өметләндерде. Татарстанның фермерлар һәм крестьян хуҗалыклары ассоциациясе рәисе Камияр Байтимиров сөйләгәнчә, республикадагы биш мең фермер тарафыннан файдаланыла торган комбайннар - 76, тракторлар - 60 һәм тагылма агрегатлар 78 процентка искергән. Шунлыктан, «баш фермер» республикада авыл хуҗалыгы машиналарын күпләп җитештерүне ихластан хуплады.

Комитет рәисе Таһир Һадиев: «Без авыл хуҗалыгы машиналары җитештерү мәсьәләсендә «диагноз» гына куябыз әле. Фән белән хезмәттәшлектә бу мәсьәләне дә җиңеп чыгачагыбызга ышанам», - дип, сөйләшүгә йомгак ясады. Дөресрәге, зур сөйләшүгә старт бирде.