Модельер Ләйсән Хаҗиева: «Милли киемдә 100 еллык упкын бар»

—    Бу минем өчен могҗиза. Җырчы да, журналист та, язучы да үз иҗатын күрсәтәсе килгән кебек, минем дә үз эшемне күрсәтәсем килә. Шуны билгеләп үтәргә телим: мин реконструкция белән дә, тарихи костюмнар белән дә шөгыльләнмим, мин стилизация ясыйм. Ягъни без барыбыз да көндәлектә кия ала торган киемнәр ясыйм, - диде Ләйсән Хаҗиева.

«Милли стиль by Ләйсән Хаҗиева» кием күрсәтү программасы үз эченә  берничә коллекцияне алган. Модельер татар костюмыныж борынгыдан алып, бүгенге көнгә кадәр үзгәрешен күрсәтергә теләгән. Һәр этап бер сүз белән билгеләнгән: «Тарих», «Зәвыкъ», «Затлылык», «Милли», «Стилле».
Төрле коллекцияләр төрле тукымалардан эшләнгән. Монда ефәк тә, бәрхет тә, табигый мамык та бар. Төрле ташлар кулланылган. 

Коллекция тәкъдим итүләре арасында артистлар чыгышлары да булачак. Зөлфирә һәм Алмаз Мирзаяновлар, Алсу һәм Азат Фазлыевлар, Рината Тэй чакырылган. Алып баручы – Илмир Ямалов.

Милли киемдә киенеп килегез дигәч, хатын-кызлар бүген калфаклар кия. Әмма бездә калфак кына түгел бит, башка бик күп матур киемнәр, элементлар бар, дип ассызыклады Ләйсән Хаҗиева.

—   Бездә милли киемдә зур упкын барлыкка килде. Бер гасыр элек татарлар милли киемнән йөргән. Әмма аннары инкыйлаб була һәм милли кием тыела. Хәзер без яңадан мода революциясен ясыйбыз. Безгә менә шушы 100 елны куып җитәргә кирәк. Һәм бу бик тиз башкарылырга тиеш, - ди Ләйсән Хаҗиева. 

Бүген Татарстанда хатын-кызның образында милли үзенчәлегебезне чагылдырырга омтылучы осталар саны арта бара. Әмма араларында ир-атларны күздә тотып эшләүчеләр бармак белән генә санарлык. Ләйсән Хаҗиева сүзләренчә, хатын-кызлар киемгә күбрәк игътибар бирә, ә ир-атка аңа өс-башы чиста-пөхтә булса, шул җитә. Әмма соңгы вакытта милли төсмердә киенергә теләүче ирләр күбәйгән. Шуңа күрә модельер киләчәктә ир-атлар коллекциясен булдыру турында да уйлана.