Рөстәм Миңнеханов: Судлар алдында җитди бурычлар тора

Рөстәм Миңнеханов билгеләп үткәнчә, узган ел ил өчен җиңел булмады. "Россиягә басым ясау, санкцияләр кертү бездән ныклык һәм тиешле чаралар таләп итә. Бу, әлбәттә, дәүләт хакимиятенең барлык тармакларына, шул исәптән суд тармагына да кагыла. Суд органнары кыска вакыт эчендә хәрби комиссариатлар һәм чакыру комиссияләре эшчәнлегенә бәйле эшләрне карарга тиеш. Шул ук вакытта гражданнарның хокуклары бозылган очракта, аларны яклауны тәэмин итү бик мөһим. Шуның белән бергә хокуклардан явыз ният белән файдалануга юл куярга ярамый", - диде ТР Президенты.

Ул билгеләп үткәнчә, республика һәм Россия Федерациясе тотрыклылыгын тәэмин итүгә Татарстан Югары суды эшчәнлеге экстремизм яклы иҗтимагый һәм дини берләшмәләрне бетерү турындагы административ эшләрне карау өлешендә җитди өлеш кертә. Республика территориясендә иҗтимагый иминлекне какшатуга, милли һәм дини ызгыш-талаш чыгаруга юл куймау - төп өстенлекләрнең берсе. "Татарстан экстремизмны булдырмау мәсьәләләрендә һәрвакыт катгый принципиаль позициядә торды", - дип белдерде Рөстәм Миңнеханов.

Хезмәт хакын түләтү турында күп санлы хезмәт бәхәсләре тотрыклы рәвештә саклана. Татарстан Президенты сүзләренчә, бу  үз вакытында һәм тулы хезмәт хакы түләү  хокукларын суд яклавына ихтыяҗ зур. Ул бу юнәлештәге эшне активлаштырырга һәм гражданнарның хезмәт өчен түләү буенча конституциячел хокукын бозмаска чакырды.

"Коррупция җинаятьләре саны да борчый. Гаеплеләр законның катгыйлыгы нигезендә җавап бирергә тиеш. Алар үз гамәлләре белән дәүләткә матди генә түгел, абруй ягыннан да зыян китерәләр. Дәүләт органнары мондый хокук бозуларны бетерү өчен уртак көч куярга тиеш. Шул ук вакытта коррупция фактларын булдырмауның барлык алымнарын кулланырга кирәк", - дип ассызыклады Рөстәм Миңнеханов.

Татарстан Республикасы Президенты искә төшергәнчә, 2014 елдан башлап республикада дөнья юстициясен үстерү максатларында программа методы кулланыла. Соңгы 3 елда Татарстан бюджетыннан дәүләт программасы чараларын гамәлгә ашыруга 1,8 млрд сумнан артык акча бүлеп бирелгән. Финанслауның төп юнәлешләре үзгәрешсез кала: хезмәт хакы, агымдагы ремонт, капиталь ремонт, матди-техник тәэмин итү.

Узган ел җәмәгать судьяларына йөкләнеш 20%ка арткан. Бу җәмәгать судьялары аппаратларында кадрлар китү факторларының берсе. Республика Юстиция министрлыгы җитәкчелегенә мөрәҗәгать итеп, Рөстәм Миңнеханов җәмәгать судьялары аппаратларында кадрлар кытлыгын киметүгә, хезмәткәрләрне стимуллаштыруның яңа ысулларын эзләүгә һәм аларны үз коллективларында эшләргә этәрүгә юнәлдерүче эшне дәвам итәргә чакырды.

Татарстан Президенты җәмәгать судьялары тарафыннан электрон сервисларны куллану өлкәсен киңәйтү темасына аерым тукталды. Әйтик, 2022 елның 1 сентябреннән алар башкарма документларны җибәрү һәм башкарма эш алып баруны электрон формада күзәтү мөмкинлеге белән тәэмин ителгән. "Татарстан Республикасы җәмәгать судьяларының Интернет-порталы"н модернизацияләү Интернет челтәре аша җәмәгать судьяларына мөрәҗәгать итәргә мөмкинлек бирде. Моннан 4 мең 670 гариза бирүче файдаланган.

"Судлар алдында җитди бурычлар тора. Сезнең бердәм коллектив аларны уңышлы башкарыр, дип ышанам", - дип өстәде Рөстәм Миңнеханов.

Хисап нотыгында ТР Югары Суды Рәисе Илгиз Гыйләҗев хәбәр иткәнчә, узган елда республика судларында 1 млн 135 мең материал һәм эш каралган.

Җинаять эшләре саны 6%ка - 114 меңгә кадәр кимегән. Бер елда 14 мең кеше хөкем ителгән. Эшләр туктатылган акланган затлар саны - 5 мең кеше яки 20%. Шулай ук ТР Югары Суды Рәисе кадрлар җитмәү турында да билгеләп үтте. Бүгенге көндә республикада 101 судья җитми.

ТР Суд департаменты идарәсенең 2022 елгы эшчәнлеге нәтиҗәләре турында Идарә башлыгы Җәүдәт Салихов сөйләде.