Татарстанда 60 меңнән артык аучы теркәлгән

Татарстанның Биологик ресурслар буенча комитет рәисе урынбасары Рамил Шәрәфетдинов сүзләренчә, Татарстанда 60 меңнән артык аучы теркәлгән. 
– Республикада аучылар өчен кызыксыну тудыра торган 81 төрле ау ресурсы исәпләнә. Аларның гомуми запасы – 2,7 миллиард сум, – диде ул матбугат очрашуында. 

Спикер журналистларга хайваннарны кышкы исәпкә алу тәмамлануын да хәбәр итте. Ике ай эчендә, 14 гыйнвардан 14 мартка кадәр, Татарстанның Биологик ресурслар буенча дәүләт комитеты, аучылык хуҗалыклары  белгечләре һәм бу эшкә битараф булмаган аучылар 14,5 мең чакрым юл үткән. Шуның нәтиҗәсендә республикада пошиларның саны – 2 процентка (16 066), кыр кәҗәсенең – 10 процентка (16 579), сусарның – 8 процентка (2 793), кыр тавыгының 37 процентка (156 392) артуы билгеле булган. Шул ук вакытта кайбер җәнлекләр кимегән: кабаннар – 21 процентка (445), тиеннәр – 5 процентка (4 102), боҗырлар 20 процентка (5 228) азрак чыккан. 

Өченче ел рәттән республикада кышкы исәпләү маршруты материаллары махсус автоматлаштырылган программа комплексы кулланып эшкәртелә. Бу исәпләү барышындагы хаталарны вакытында күрергә һәм төзәтмәләр кертергә булыша. Программа комплексы үзенә кертелгән бөтен исәпләү мәгълүматларын автомат рәвештә анализлап, аучылык ресурслары санын исәпләп чыгара.