Татарстанда сәнәгать белән фән – бер-берсенә “дус һәм туган”

“Татар-информ” мәгълүмат агентлыгында узган матбугат конференциясендә Татарстан Фәннәр академиясе президенты Рифкать Миңнеханов үзенең сүз башында ук Россия Президенты Владимир Путинның Федераль Җыенга юлламасында илебездә икътисадның тотрыклылыгын тәэмин итә торган өлкәләрдә технологик мөстәкыйльлеккә ирешү бурычы куйганлыгын искәртте.

– Республикада Татарстан Рәисе Рөстәм Миңнеханов тәкъдимендә 2024 ел – Фәнни-технологик үсеш елы. Татарстанда фәнни-технология программасы гамәлдә. “Татнефть” җәмгыятендә инженерлык мәктәбе, Казан федераль университетында фәнни-мәгариф мәктәбе, Иннополиста физика-математика мәктәбе эшли. Конференциядә яңгыраш тапкан фәнни чишелешләр Хөкүмәт карамагына тәкъдим ителәчәк. Фәнне актив файдалануны Россия Президенты Владимир Путин үзе бурыч итеп куйды. “Татнефть”, “СИБУР” җәмгыятьләре яңа фәнни ачышларны да гамәлгә ашырырга омтылыр, – диде Рифкать Миңнеханов.

Конференцияләр берьюлы 5 югары уку йортында барачак. Галимнәр технологик эшләрне математик модельләштерү, роботлар төзелешендә математик алымнар, ясалма акыл, кибер-физика системаларын проектлау, сәнәгать кибериминлеге, инженерлар әзерләү, яшь галимнәр темаларында чишелешләр тәкъдим итәчәк һәм фикер алышачак.

Санкт-Петербургның Петр Великий исемендәге политехник университеты профессоры Александр Большаков видеоэлемтә аша:”Казандагы фәнни мультиконференциядә Россия, Белоруссия, Үзбәкстан, Таҗикстан катнаша. Хәзер Европадан килмиләр, шулай да Германиядән пенсиядәге инде эшләмәүче бер галим Казан конференциясенә килергә исәпли”, – диде.

Санкт-Петербургның дәүләт технология институты профессоры Тамара Чистякова да видеоэлемтә аша:”Татарстан – сәнәгатьне фән һәм мәгариф белән бәйләүдә инновацион үзәк. Бу башкаларга үрнәк мисал. Казандагы конференциядә чит ил технологияләренә алмаш булдыру, биоинженерия, ясалма акыл темаларына сөйләшү яхшы нәтиҗәләр бирер”, – диде.

Казанның А. Н. Туполев исемендәге милли тикшеренү техник университеты ректоры Тимур Алибаев, Казанның милли тикшеренү технология университеты ректоры Юрий Казаков, Казан федераль университеты ректорының беренче проректоры Дмитрий Таюрский югары уку йортларының Татарстандагы һәм Россия төбәкләрендәге сәнәгать предприятиеләре белән фәнни элемтәләрдә торулары турында әйттеләр.