Кызының мәетен диңгезгә ыргыткан Гөлнара Лактионованы ирегеннән мәхрүм итәрләрме?

Полиция ачыклавынча, ул - 27 яшьлек Уфа кызы Екатерина Лактионова. Озак авыруыннан соң, мәңгелеккә күзен йомган кызның әнисе, кайгыдан нишләргә белми, баласының мәетен диңгезгә ыргыта.

Экспертиза раславынча, кыз анорексия белән авырган һәм шуннан үлгән. Чемодан табылгач, полиция хезмәткәрләренә бу хәбәрне кызның әнисе - Гөлнара Лактионова үзе җиткерә. Янәсе, кызының мәете белән бер атна яшәгәннән соң, кайгыдан бу акылсыз адымга барган.

Моннан берничә ел элек, Гөлнара Лактионова Уфадан Италиягә эш эзләп китә. Тиз арада сиделка булып урнаша һәм берничә ел дәвамында хезмәт күрсәтү өлкәсендә эшли.

- Кызын ул әнисе белән Башкортстанда калдырды. Ə Элекке иренә, күрәсең, кызы кирәк түгел иде, чөнки тәбрия эшендә катнашканын күргәнебез булмады. Игътибар җитмәгән кыз, ничек тә тирә-яктагыларны үзенә каратмакчы булды, - ди гаилә танышлары.

Мәктәпне тәмамлагач, Катя хокук факультетына укырга керә. Əмма кечкенәдән килгән топ-модель булу хыялы аңа тынгы бирми. Максатына ирешер өчен, болай да ябык булган кыз, диеталарга утырып, тырышып ябыга башлый.

- Без бер төркемдә укыдык, гел аралаштык, бергәләп кичәләргә йөри идек. Аның белән күңелле иде. Əмма 3-4 курсларда: "Əйдә безнең белән буфетка", - дигән тәкъдимне кире кагып, "Мин су эчтем инде", - дип җавап бирә башлады. Су, кефир, кишер, алма - бар ашаган әйбере шулар иде. Чыгарылышка бөтенләй ябыкты: озын буена авырлыгы 40 килограмм да булмагандыр, - ди төркемдәше Эльнара Хәбибуллина.

Катяны Уфа модельлек агенстволары эшкә алмый һәм кыз әнисе янына Италиягә юл тота. Əмма монда да аны көтеп тормаганнар, чөнки бар фирмалар да кире кага. Депрессиягә бирелеп, кыз тагы да ныграк ябыга. Берничә тапкыр Римини дәваханәсендә дә ятып чыга, әмма дәвалану яхшы нәтиҗә бирми. Үлгәндә 174 сантиметр буйлы кызның авырлыгы 35 килограмм була.

- Əнисен гаепләмибез... тик белгечләргә вакытында мөрәҗәгать итеп, нигә ул кызын коткармаган? Ни өчен аны диңгезгә ыргытырга булган? - ди Гөлнараны белгәннәр.
Фаразлар буенча, әни кешенең, чит илдә кызын җирләргә акчасы булмаган. Əлеге хезмәт Европа илләрендә ким дигәндә 2500 евро (150 мең чамасы) тора.

Бүгенге көндә Гөлнара Лактионова өй арестында. Кызының язмышы турында әтисе бер әйбер дә белми.

- Белмим, җирләделәрме, яки кремацияләделәр микән?! - дигән ул Уфа журналистларына.

Хәзерге вакытта Италия полициясе әлеге факт буенча җинаять эше кузгаткан. Моннан тыш, әни кеше җинаять эзләрен яшергән өчен дә җавап бирергә тиеш булачак. Хокук белгече сүзләренчә, Гөлнара Лактионованы ике елга ирегеннән мәхрүм итүләре мөмкин.