Бәйрәм үтте, юшкыны калды

Татарстаныбыз өчен зур мәгънәгә ия бәйрәмебездә тамашачы буларак катнашу өчен, «Тимер юл вокзалы» тукталышында автобустан төшеп калдым да Мәскәү урамыннан җәяүләп киттем. Аннары юлымны Межлаук урамыннан Сулъяк Болак урамы буйлап дәвам иттем...

Вак яңгыр сибәли. Узган еллардагы күренешләрне күз алдына китереп, чагыштырып карыйм. Бер җирдә дә Татарстан флагы эленмәгән, бәйрәм рухы сизелми. Элеккеге педагогика институты бинасында (хәзерге КФУ бинасы) гына флаг бар (анысы да хәзер түгел, ә кыштан ук эленгән килеш тора). Флагны бинага элү өчен махсус машиналар кирәкми, өстәмә чыгымнар да сорамый, һәр бинаның хуҗасы бар бит! Татарстан урамы аша чыгып, Галиәсгар Камал исемендәге театр каршына таба барам. Ул яктан тонык кына гармун тавышлары ишетелә («Уйнагыз, гармуннар!» исемле тамаша бара). Бернинди флаг та юк, хәтта ел саен театр түбәсенә эленә торган зур ике флаг та күренми! Бәйрәм уңаеннан оештырылган сату итүләр юк та юк инде...

Яңгыр көчәя башлагач, тамаша карарга килгән халык та ашыга-ашыга ышык урын эзләп тарала башлады...
1990 елгы вакыйгаларны искә төшерәм. Казаныбызның Ирек мәйданында меңләгән кеше Татарстанның Дәүләт суверенитеты турындагы Декларацияне кабул иткәнне көтеп тора, вакыт соң булуга карамастан, берсе дә өенә кайтып китми. Шау-шу, төрле флаглар белән мәйдан чуарланган, күпсанлы милиция хезмәткәрләре һәр хәрәкәтеңне күзәтеп тора... Милли хисләрнең югары ноктасына күтәрелгән чагы...

30 август - Казан көне дә бит әле. Шәһәребезнең хөрмәтле мэры бәйрәмне ничек үткәрү турында уйлангандыр. Ни өчен Татарстан флагларын биналарга элмәделәр икән?