Рөстәм Миңнеханов: “Ишегалды игелекле урын булсын!”

Әлеге чарада Татарстан Республикасы Президенты Рөстәм Миңнеханов, Россия Федерациясе Президентының Идел буе федераль округындагы вәкаләтле вәкиле Игорь Комаров, Казан мэры Илсур Метшин, Киров һәм Мәскәү районнары хакимияте башлыгы Сергей Миронов катнашты.

- Ишегалды игелекле урын булсын! Бәйрәм белән котлыйм!-дип сәламләде татнтанга җыелган ветераннарны һәм казанлыларны Рөстәм Миңнеханов. - Копыловка һәйкәл ачтык, ул Казанда авиация тармагын үстерүгә зур хезмәт өлеше керткән шәхес. Самолетлар, вертолетлар төзелә, ветераннарны онытмыйбыз, инде арабызда булмаганнары да хәтердә. Казанда күп эшләр башкарыла, йортлар һәм ишегаллары төзекләндерелә, бу эшләр дәвам итәчәк. Шушы ишегалдын төзекләндерүдә иганәчеләр дә зур ярдәм күрсәтте, аларга моның өчен рәхмәт! Ишегалдыгызда тормыш кайнап торсын.

Игорь Комаров үзенең котлау сүзендә Татарстаның динамик үсештә  булуын әйтеп үтте. Илсур Метшин Казанда киң колач белән Ворлдскиллс эшче һөнәрләре буенча дөнья чемпионатының уңышлы узганлыгын искәртте.

- Казанда быел 11 балалар бакчасы, 2 мәктәп ачылды. Торак йортлар, социаль учреждениеләр, ишегаллары капиталь төзекләндерелә. Моның өчен Татарстан Президентына һәм Россия Федерациясе Президентына рәхмәт! - диде Илсур Метшин.

“Мин күкләрне сайлыйм” дигән ишегалды авиация эчтәлегендә төзекләндерелгән. Гагарин урамындагы 103нче, 105нче. 107нче һәм Восход урамындагы 20нче, 22нче йортларны берләштергән ишегалды өлкәннәр өчен ял урыннары, спорт мәйданчыклары белән җиһазландырылган.