#Кыскача яңалыклар 28 август 2018, 15:14

Төркия белән Татарстанны татарлар берләштерә

28 август 2018, 15:14

Казан татарлары җәйге ялларын Төркиядә уздырса, төрек татарлары Казанга килә. Анталиядә яшәүче хокук фәннәре кандидаты, адвокат Фәнис Зыялы (тумышы белән Арча якларыннан), Анталиянең Коньяалты районы хакимияте каршындагы шәһәр думасы чит ил гражданнары эшләре буенча совет рәисе Оксана Назарова, «Төркия авазы» дәүләт телерадиокомпаниясенең татар редакциясе җитәкчесе Сәгыйть Хәйри, эшмәкәр Рамил Хәбибуллин берничә көн дәвамында Казандагы төрле чараларда катнашып, Төркия татарлары тормышы белән таныштырды.

Скопировать ссылку

Рамил Хәбибуллин сүзләренчә, рәсми булмаган мәгълүматлар буенча, Анталия тирәсендә 2 меңгә якын татар яши. Быел алар беренче тапкыр Анталия татарлары Сабантуй бәйрәмен дә оештырган иделәр. Әлеге бәйрәмдә катнашкан «Шәһри Казан» хәбәрчесе Эльвира Мозаффар аның турында язып та чыкты әле. Төрек татарлары Сабантуйга әзерлек эшләрен бер ай эчендә башкарып чыкканнар. Хәзер алар үзләренә яңа максатлар куйган. Быелдан Анталиядә татар теленә өйрәтүче мәктәп ачылырга мөмкин. Ул өч төрле юнәлеш буенча белем бирәчәк. Һәр төркемдә 15әр кеше укыр дип фаразлый алар.

– Гап-гади татар авылында татар балаларының үзара русча сөйләшүе шаккатыра. Шунда ук китап кибете бар. Анда татар китаплары бер кечкенә генә киштәгә урнаштырылган. Бу бик көенечле әйбер, әлбәттә. Татарстанда барган тел сәясәтенә кагылышлы вакыйгалар белән дә һәрвакыт кызыксынып килдек. Төркиягә күченеп килгән ишле гаиләләр бар. Безнең төп максат – туган телне саклап калу. Без, көчебездән килгәнчә, балаларга татар телен өйрәтәбез. Китаплар, мультфильмнар ярдәмендә генә дә балага татар телен укытып була, – ди Фәнис Зыялы.

Шул максаттан Төркия татарлары китап кибетләреннән бик күп әдәбият, дәреслекләр туплаган. Болар барысы да балаларга татар телен өйрәтү өчен кирәк булачак.

– Әгәр дә безгә кунакка килсәгез, безгә «Сәлам» дигән 1-3нче сыйныфлар өчен татар теле дәреслеген алып килегез әле. Без аны эзләгән идек, ул әлегә сатуга чыкмаган, – дип мөрәҗәгать итте Төркия татарлары Казан татарларына.

Оксана Назарова сүзләренчә, киләсе җәйгә Анталиядә татар мәдәнияте көннәре үткәреләчәк.

– Аны Сабантуй бәйрәме белән туры китерергә җыенабыз, – диде ул.

Төркия татарлары Төркия белән Татарстан арасында элек-электән җылы мөнәсәбәтләр булуы турында да искәртте.

– Россия белән Төркия арасы суынган вакытта да, Татарстан Президенты Рөстәм Миннеханов, без Төркия белән сәүдә, мәдәни, икътисади бәйләнешләрне өзмәячәкбез, диде. Шуның белән төрек хакимиятенең хөрмәтен яулады. Җирле халык арасында да татарларга ихтирам зур, – диде Фәнис Зыялы.

Кызыклы яңалыкларны күзәтеп бару өчен Т елеграмга кушылыгыз.

#Татарстан #төркия