Сергей Павлик исән-сау һәм көрәшкә кайтырга җыена!

Хәтерләсәгез, июль аенда көрәшчеләр төркемендә танылган батыр Сергей Павлик махсус хәрби операциядә һәлак булган дигән хәбәр таралды. Ул чакта без әлеге хәбәргә ачыклык кертү өчен Сергейны көрәш келәмендә танытуга зур өлеш керткән Фәнис Җаббаровка мөрәҗәгать иттек. «Бу сорау белән күпләр мөрәҗәгать итте. Нәрсә дип әйтим? Әлегә хәбәр имеш-мимеш дәрәҗәсендә. Чөнки бернинди расланган мәгълүмат та юк. Туганнары белән сөйләштем, алар да бернәрсә белмиләр», дип белдергән иде безгә Фәнис әфәнде.

Укырга: Фәнис Җаббаров көрәшче шәкерте Сергей Павлик турындагы хәбәрләр хакында

Һәм менә, ниһаять, Россиянең көрәш федерациясе социаль челтәрләрдәге рәсми сәхифәсендә Сергей турында хәбәр белән уртаклашты. Бүгенге көннең иң титуллы көрәшчеләреннән берсе, көрәш буенча күп тапкырлар дөнья чемпионы Сергей Павлик 7 айдан соң хәбәргә чыккан һәм спортка кайтуы турында белдергән. Спортчы Калуга өлкәсендә ялда икән. Федерация вәкилләре Сергей Павлик белән шәхсән телефон аша сөйләшкәннән. «Бер ел инде шөгыльләнмәсәм дә, көрәшергә теләдем, үземне яхшы хис итәм. Россия Кубогында көрәшергә теләк бар. Карарбыз, көрәшем ничек булып», дип белдергән Павлик турнирда катнашырга теләге барлыгы белдереп. Федерация исә легендар көрәшченең 5-7 декабрь көннәрендә Казанда узачак көрәш буенча Россия Кубогында чыгыш ясавына өметләнә.

Иң мөһиме, Сергей Павлик исән-сау. Иң мөһиме, аның көрәшергә теләве, көрәшкә мәхәббәте сүрелмәгән.