Лилия Хәмитова: “Игезәгем Алия Винариска «юк», диде...”

Матур үтте бәйрәмнәре. Интернет киңлекләренә куелган видеолары кызыклы, фотолары җанлы иде. Икесе бер көндә туып та, быел ни сәбәпле аллы-артлы көннәрдә чиратлашып бәйрәм итүләр белән кызыксынып, Лилиягә шалтыраттык.
– Алия үзе шулай теләде. Үз өемә кунакларны чакырам, диде. Кода-кодагыйларын дәшәсе килде, табынны үзенчә көйләде. Өйдәгечә итеп утырдык, ләкин бик күңелле булды, рәхәтләнеп сөйләштек,  көлештек, биештек, җырлаштык. Туган көн мәҗлесләрен өйдә үткәрмиләр бит хәзер, бу матур гадәт тә халык кулыннан читләшеп килә. Үзең теләгәнчә кунак сыйлау да бик рәхәт. Винарис алдан ук Алиягә әйтте, синең туган көнеңне үзем үткәрәм, ресторанда, бездән бүләк шул булыр, диде. Алия Винариска юк, диде, килешмәде. Ә мин бөтенләй каршы идем, мәйтәм, быел туган көнемне үткәреп тә мәшәкатьләнмибез, әйтмә дә, җыенмыйм да, берәүне дә чакырмыйм, дидем. Винарис барысын да үзе эшләде. Хәтта залда урындыгымны да бер җирдән икенче җиргә төртеп куйган кеше түгелмен. Кунаклар исемлеген дә ул төзеде, артистларга кадәр ул чакырды. Бәйрәм башланганчыга кадәр кемнәр киләсен белмәдем дисәм дә алдамам. Гайфуллага кадәр эзләп тапкан бит! Гайфулла белән гастрольләрдә күп йөрелде, әмма дә җайлы кеше ул. Мине зурлап килгән һәр кунагыма рәхмәтем чиксез. Ә иң зур рәхмәтем Винарисыма, әлбәттә. Мине зурлап, хөрмәтләп яши! Һәр хатын-кызга шундый бәхет телим, – диде Лилия. – Их, без бәхетле буын әле, сагынып сөйләр, искә алыр, кунакларга дәшер дусларыбыз бар. Без дуслар, туганнар белән күрешеп яшәдек, яшибез. Бүгенге буын әнә виртуаль дуслар белән аралаша, алар нишләр икән безнең яшькә җиткәч, дип борчылып та куям. 

Игезәкләрнең туган көннәре – 2 август. Алиянең кунаклары 2 августта бәйрәм итсә, Лилиянекеләр 3 август көнне ресторанга кунак табынына җыелган.  Алия белән Лилия бер-берсенә туган көне бүләге итеп акчалата конверт кына бирешкәннәр. 
– Без бер-беребезгә иң зур бүләк! Кыз туганың булудан зур бүләк була да алмый, ди җырчы. 

Лилиянең туган көн бәйрәменә 70 тән артык кунак килгән. Исемлеккә 100 дән артык исем язылса да, җәй – ял чоры, кем диңгездә, кем кая, дигәндәй, ләкин мәҗлес өчен килгән кадәрлесе дә бик чамалы гына иде, бәйрәм әйбәт үтте ди ул.