Бер учка хәер салырлык та акчаң булмагач, нинди ир соң син?

Эшсәфәренә барыш. Ягулык салырга туктадым. Монысында тәртип шундый: башта түлисең, аннары саласың. Мин акча түләгәндә заправка хезмәткәре, бензинны салып та куйган рәхмәт төшкере. 

Байбичә кебек чыктым да, эше беткән, мәйтәм, өстемне салыйм әле, руль артында җиңелчә бару рәхәт, миче шәп, аннан кояш нурлары да көлә – тәрәзә аша да әйбәт җылыта. Тунымны гына чиштем... бер рәттә ике колонка, минем артка килеп туктаган машинадан төшкән парны кассадан чыкканда ук шәйләгән идем. Хатыны чытлыкланып, әллә ничә мәртәбә сорады иреннән, янәсе кайсы колонкада әле без? Кулына тоткан акча янчыгын болгый-болгый акча түләргә кереп югалгач, ире миңа сүз катмасынмы! Туңасың бит дигән була. Юк, дидем, кырыс кына. Машинага кереп утырган идем, минем ишек төбенә килеп тә баскан. Тәрәзәмне төшереп кенә, ни кирәк мәйтәм. Шундый дорфа эндәштем, үз тавышымнан үзем оялдым, әмма сиздермәдем. Сезнең чәчләрегез бик матур дигән була. Булса ни, дидем дә кузгалып та киттем. Елмаеп басып калды. Авызы колагында, хатыны касса янында, ә күңеле кайларда икән аның?

Юлда да уемнан чыкмады. Үземне ир хатыны сыйфатында тоясым килде. Нишләр идем икән, аныкы кебек акчамны учка ныграк кысып, кассага йөгерерменме? Юк! Гомердә алай эшләмәдем, моннан соң да эшләмәм, ашыгу-сырхаулап тору ише очракларны санамаганда, билгеле. Ә бит мондый күренешләр еш күзгә чалына. Берсендә банк картасы белән түли торган автозаправкага тукталдым. Баскалыйм бит терминалга, шул вакыт олырак яшьтәге бер апа йөгереп килде яныма. Карап торыйм әле, өйрәнеп калыйм ди, җаныкаем. Нинди хәл соң бу?

Матриархат чорына күчеп барабызмы әллә? Инде моның ишесенә генә ир-атлар каударланса да әйбәт. Бәлки хатын-кызларның тормышка җайлашуыдыр? Ир-ат булсаң утырт инде җәмәгатеңне арбага гына, ягулык салырлык акча белән генә эш итә алмыйсыңмыни? Кесәңдә 30 татарны ашатырлык димим, бер учка хәер салырлык та акчаң булмагач, нинди ир соң син? Хатыны артында уҗым бозавы кебек ияреп йөрүләрен күрәсең дә, нишлисең, горур күңел буйсынмый башлый, бетә ирләргә хөрмәт. Ирмен дияр өчен, тимер атыңны гына булса да үзеңә иярләп торырга кирәк! 

Ә бит бу халәтенә ир-ат үзе дә сәбәпчедер инде, шулай булмаса җиргә нык басып йөрүенә холкындагы берәр җитешсезлек комачауламас һәм акча янчыгыннан да ерагайтмас иде аны. Кайбер парлар бер эшне икегә бүлеп эшләргә дә ярата анысы, ләкин кадерле була белсә иде бу хатын-кыз заты! Этикет дигәне дә шулай куша, утыр күкрәгеңне киереп, ыспай гына, матур итеп! Тыкшынма инде ирнең бар хаҗәтенә дә. Ягулык салу ноктасына килгәч, кайнашсын үзенчә генә. 

Фото: ru.freepik.com