Атна башында интернетта бөтен дөньяны шаулаткан видеоязма барлыкка килде. Анда Нигериянең «Боко Харам» исламчылар төркеме 230 кызны җенси коллыкка сатып җибәрү белән яныйлар. Кызларның барысы да 12-15 яшьтә, алар 14 апрель көнне Нигериянең Борно шәһәрендә урнашкан бер мәктәптән урлап алып кителгән булганнар.
Җинаять өч атна элек эшләнелгән булуына карамастан, Нигерия хокук сакчылары террорчыларның эзенә һаман да төшә алмый. Шушы вакыт эчендә тоткынлыктан 53 кызның качуын, икесенең әсирлектә үлүләрен генә ачыклый алганнар. Ә ул арада «Боко Харам» яңа һөҗүмнәр ясый: кичә алар Нигериянең бер авылыннан тагын 8 кызны урлап киткәннәр. Нигерия хакимияте тоткын кызларны эзләү эшенә хәзер бөтен көчен җиккән. Илгә үз ярдәмнәрен АКШ белән Бөекбритания дә тәкъдим иткән.
Россия хокук сакчыларының боевиклар белән көрәштә уңышлары зуррак. Шушы көннәрдә генә махсус операция нәтиҗәсендә, Дагыстанда 4 террорчыны юк итүгә ирешелде. Махачкала шәһәренең бер торак йортында камауга алынгач, алар хәрбиләргә каршы ут ачканнар. Нәтиҗәдә, атыш вакытында барысы да җитди яралар алган. Әлеге җинаятьчел төркемнең 9 май парады вакытында терактлар ясарга әзерләнгәнлеге ачыкланган.
Иң мөһим һәм кызыклы язмаларны Татмедиа Telegram-каналында укыгыз
