Мәхәббәт учагына ялкын өстәгез: 2 - 9 апрельгә йолдызнамә

Кучкар (21 март – 20 апрель)
Аю кышка йокыга талган сыман, сез дә кышкы “йокыдан” соң уянып җитә алмыйсыз. Урамда җылы кояш булганда, табигатькә чыгып спорт белән шөгыльләнеп керегез. Организмыгыз уянсын. 

Үгезбозау (21 апрель – 20 май)
Сәләт орлык сыман. Аны карап, су сибеп торганда гына ул җимеш бирә. Сезнең тормыш “туфрагында” андый орлыклар бик күп. Яз килү хакына булса да, аларга игътибар бирегез, тамыр җибәреп үсеп китсеннәр.

Игезәкләр (21 май – 21 июнь)
Соңгы вакытта нәрсә әйткәнегезне тыңларга өйрәнегез, чөнки артыгын әйтеп ташлавыгыз бар. Үз фикерең булу әйбәт, ләкин болай да дөрләп янган бәхәскә утын салырга кирәкми.

Кысла (22 июнь – 22 июль)
“Булмый”, “Барып чыкмый”, “Тотынма да” – дип үзегезгә үзегез киртә куймагыз. Бу эчке курку сезне артка сөйри. Дилбегәне кулыгызга алырга, курыкмаска тырышыгыз.

Арыслан (23 июль – 23 август) 
Әкиятләрдә геройлар гадәттә ике юл алдында уйланып калалар. Ә тормыш сезне ике түгел, аннан да артык сукмак чатында калдырыр. Әкияти тылсым ярдәменә ышанып булмый, үзегезгә сайларга туры килер.

Кыз (24 август – 23 сентябрь)
Тормыш – ул система түгел! Солдат сыман бер үк вакытта уянып, ашап, эшкә барып, кайтып яшәүнең тәме кая соң? Балаларча чикләрдән чыгып, “шаярып” карагыз әле, бәхетнең башка яклары булганын күрергә мөмкинсез. 

Үлчәү (24 сентябрь – 23 октябрь)
Якын вакытта дусларыгыз белән арагыздан кара мәче үтәргә мөмкин. Шуңа гайбәтләрдән өстен булыгыз, берничә еллык дуслыгыгызны чит сүз аркасында чүплеккә ташламагыз.

Чаян (24 октябрь – 22 ноябрь)
Зур суммалы әйберләр алырга уйлаган Чаяннар өчен уңышлы чор. Күптән акча җыеп, ләкин алырга куркып йөргән булсагыз, борчуларыгызны онытыгыз. Атна ахырында якын кешегез бүләк әзерләргә мөмкин.

Укчы ( 23 ноябрь – 21 декабрь)
Сөйгән ярыгыз белән арагыз суынырга мөмкин. Бер-берегез белән сөйләшмәгәнгә күрә, һәрберегез үз нәтиҗәсен ясый бит. Мәхәббәт учагына ялкын өстәгез, дөрләп янып китсен.

Кәҗәмөгез (22 декабрь – 20 гыйнвар)
Тормышта кыенлык килеп чыкканда без я песи сыман качабыз, я горур арыслан сыман алар каршысына барабыз. Йолдызлар сезгә ешрак икенче юлны сайларга киңәш итә. 

Сукояр (21 гыйнвар – 18 февраль)
Тукайның “Эш беткәч уйнарга ярый” шигырен хәтерлисезме? Менә шундагы кечкенә малай сыман тотарга кирәк булыр үзегезне. Урамдагы якты кояш, дуслар бик дәшсәләр дә, эшне калдырып чыгарга кирәкми. 

Балык (19 февраль – 20 март)
Тормыш куб фигурасы сыман: аның бик күп төрле яссылыклары бар. Кеше яши-яши бер яссылыктан икенчесенә күчә, ә кемдер гомер буе бер урында кала. Тик сез алар рәтендә түгел. Куб буенча сәяхәтегезне дәвам итегез.

Фото: ru.freepik.com