Балалы гаиләләр өчен яңа ташлама барлыкка килә

Алар физик затлар керемнәренә түләнгән салымнан (НДФЛ) түләүләр ала алачак, дип белдергән Дәүләт Думасының Хезмәт, социаль сәясәт һәм ветераннар эшләре комитеты әгъзасы Светлана Бессараб.

Аның сүзләренчә, асылда эшләүче әти - әтиләр өчен НДФЛ алты процент тәшкил итәчәк, калган җидесен дәүләт каплаячак.

"Яңалык ата - аналарның финанс хәлен яхшыртырга ярдәм итәчәк, шул рәвешле, балаларны тәрбияләү бурычларына карамастан, аларны хезмәт эшчәнлеген дәвам итәргә этәрәчәк", - дип ассызыклаган депутат.

Шул ук вакытта яңа ташлама барлыкка килү турында быел яз көне үк билгеле булды. Ул 2025 елда эшли башлаячак, әмма аңа да карамастан, беренче тапкыр аннан бер елдан файдаланырга мөмкин булачак. Ягъни түләүне ата-аналар 2026 елда гына ала алачак, аны 2025 елда түләнгән керем салымы суммасыннан исәпләячәкләр. Әмма моны билгеле бер критерийларга туры килгән гаилә генә эшли алачак.

Әйтик, аның җан башына уртача кереме ул яшәгән төбәктә билгеләнгән бер кешегә яшәү минимумыннан артмаска тиеш. Моннан тыш, гаилә әгъзалары ия булган милек, күчемле һәм күчемсез милек исәпкә алыначак.

Гаиләдә тәрбияләнүче балалар 18 яшьтән өлкәнрәк булмаска тиеш. Әмма бала мәктәптә, көллияттә яки югары уку йортында көндезге бүлектә укыса, аның өчен яшь дәрәҗәсе 23 яшькә кадәр арта. Түләү сорап мөрәҗәгать иткән әти-әниләрнең үз балалары алдында алимент буенча бурычлары булырга тиеш түгел.

Бессараб шулай ук искә төшергәнчә, киләсе елдан ана капиталы 7,3% ка артачак. 2025 елның 1 февраленнән аның күләме беренче балага 677 мең сум, икенче балага - 894 мең сум тәшкил итәчәк. Моннан тыш, инфляция күләменә башка ташламалар һәм пособиеләр индексацияләнәчәк.