Казан Суздаль белән Ярославльне узып киткән

Татарстан башкаласы узган туристлык елын 3 миллион 200 мең күрсәткече белән тәмамлады. Казан үзенең 1000 еллыгын бәйрәм иткән 2005 елдагы күрсәткечтән алты мәртәбәгә күбрәк әлеге сан. Башкалабызга узган ел килгән туристларның 251 мең 973е – чит ил кешеләре. Аларның күпчелеге Кытай, Колумбия, Германия, Иран һәм АКШ кунаклары.

«Эшлекле дүшәмбе» киңәшмәсендә туристлыкны үстерү комитеты директоры Дарья Санникова сөйләгәнчә, туристларның 45 проценты поездда килгән, 23,4 проценты самолетларны сайлаган. «Казан» халыкара аэропорты хезмәтләреннән узган ел 3 миллион 140 мең пассажир файдаланган, әлеге сан 2017 елгыдан 20 процентка күбрәк.

Казан туристларны үзенең кунакчыллыгы, төрле мәдәни чаралары белән җәлеп итә. Хәзер башкалада 230 кунакханә эшли, шуларның 103е – хостел. Казан Кремле белән «Казан Ривьерасы» аквапаркы һәм кунакханә-күңел ачу комплексы – туристлар арасында аеруча популяр. Казан Кремлендә узган ел 2 миллион 923 мең турист булган.

«Ай, Да Казань!», «Тәмле Казан», «Гастрономическая карта России», «Окно в Испанию», «Фанфары Казани» фестивальләре туристлар һәм башкала кунакларының күңелен яулады. «Тәмле Казан» фестивале Россия премиясенә лаек булды. «Казан велотөне» фестиваленә елдан-ел күбрәк велосипедчылар җыела.

«КышДаКар-фест» фестивале дә туристлар һәм кунаклар өчен матур яңалык булды.
– Кайчандыр 3 миллион турист хыял гына иде, без бу үрне алдык. Суздаль, Ярославль кебек тарихи туристлык шәһәрләрен узып киттек. Санкт-Петербург, Берлин шәһәрләре дәрәҗәсенә күтәрелү хәзер безнең бурыч, – диде мэр Илсур Метшин.

Анна Арахамия фотосы