Казанны кытайлылар бик ярата

- Ерак, дип тормыйлар, Америка Кушма Штатларыннан да киләләр. Кытайдан туристлар килү елдан‑ел арта. Кытайлылар Владимир Ульянов-Ленинның музей-йортына, университетка керәләр, кызыксынып тыңлыйлар, һәйкәлләрне фотога төшерәләр. Казанда тарихи-архитектура һәйкәлләре бик күп, - ди шәһәрнең туристлыкны үстерүгә булышу комитеты директоры Михаил Зотов.
Кремль - иң мәшһүр корылма. Анда узган ел ике миллион 107 мең кеше экскурсиядә йөргән. Аннан соң исемлектә - аквапарк. Башкалабызга берничә ел элек ике-өч көнгә генә килсәләр, хәзер атнага якын булалар.

Дөньядагы шәһәрләр арасындагы trivago Glodal Reputation Ranking рейтингында Казанга 42нче урын бирелгән.
- Бу яхшы күрсәткеч. Казанда, хостелларны да исәпләгәндә, 162 кунакханә эшли. Дәрәҗәне күтәрү максатында, кунакханә хезмәткәрләре арасында «Кунакчыллык йолдызлары» дип аталган осталык конкурслары оештырыла, - ди Михаил Зотов.

Казан велотөне танылу ала бара, узган ел анда биш мең кеше катнашкан. Чит илләрдән килүче туристлар аеруча Санкт-Петербург, Сочи һәм Казан белән кызыксына икән. Планда татар халкының милли бәйрәме - Сабантуйны туристларны җәлеп итүдә төп брендка әйләндерү. Киләсе җәйдә Казансуда кече теплоходларда экскурсияләр үткәрү нияте дә бар.