Браконьерлардан 800 тонна елга балыгы сакланып калган

Анда Татарстанның Биологик ресурслар буенча дәүләт комитеты рәисе Федор Батков соңгы биш елдагы эшчәнлек турында чыгыш ясады.
– Республика советы барлыкка килгән вакыттан алып контроль-күзәтү органнары тарафыннан 19077 кагыйдә бозучы административ җаваплылыкка тартылды, 714 җинаять эше ачылды. Ачыкланган хокук бозуларның 70 проценты аеруча саклана торган су табигый территорияләренә туры килә. Биш ел эчендә сулыклардан 40 мең законсыз балык тоту җайланмасы алынды.  Биологик су ресурсларына булдырылмый калган зыянның күләме 812 млн сум белән исәпләнә. Бу браконьерлардан 800 тонна елга балыгы сакланып калган дигән сүз, – дип билгеләп үтте ул.  

Федор Батков балык продукциясен законсыз рәвештә сатуга да аерым игътибар юнәлтте.  
Биологик ресурслар буенча дәүләт комитеты браконьерлык станнарын ачыклау һәм юк итүдәге эшчәнлеген дәвам итә.

– 2017 елдан башлап 84 стан юк ителде, бүгенге көнгә суд карары белән – 64 объект. 20сенең 15е буенча суд процедуралары бара, – диде комитет рәисе.  
Районнардагы ведомствоара эшче төркемнәрнең эшен дә билгеләп үтте.
– Агымдагы елда 6 мең рейд уздырылды. 11742 административ хокук бозулар, 57 җинаять билгесе булган материал ачыкланды. Соңгы биш елда административ хокук бозулар буенча биш район элеккечә лидер булып кала бирә – Түбән Кама, Чистай, Алабуга, Мамадыш һәм Әгерҗе, – диде Федор Батков.

Фото: https://ojm.tatarstan.ru