#Төп тема 30 мая 2013, 07:05

Кызлар китсә солдатка...

30 мая 2013, 07:05

Дәүләт Думасы депутатлары «Хәрби бурыч һәм хәрби хезмәт турында»гы законга төзәтмәләр кертү турындагы закон проектын әзерләгәннәр. Анда 18 яшьтән 27 яшькәчә булган хатын-кызларга армиядә хезмәт итәргә рөхсәт бирү турында әйтелә. Төзәтмәләр инде карар өчен Оборона министрлыгына юлланган.

Скопировать ссылку

Бүгенге көндә армия хезмәтенә бары тик 18 яшьтән 27 яшькәчә булган ир-егетләр генә чакырыла. Депутатлар хатын-кызларны бу өлкәдә дә ир-егетләр белән тигез хокуклы итеп күрергә телиләр булса кирәк. Әмма хатын-кызлар мәҗбүри рәвештә түгел, ә теләкләре булса гына хезмәт итәчәкләр. Дәүләт Думасының оборона комитеты рәисе, Черноморск флотының экс-командующие адмирал Владимир Комоедов хатын-кызлар Оборона министрлыгындагы кадрлар мәсьәләләрен хәл итәргә булышачаклар дип белдергән. «Безнең илдә ир-атлар дефицит, ә хатын-кызлар янып ятучы өйгә керергә дә, чабып барган аргамакны туктатырга да сәләтлеләр. Шуңа да аларны армиягә чакырырга кирәк», - дигән ул. Уены-чыны белән әйткән, билгеле. Әмма аның: «Хатын-кызлар өчен дә эш җитәрлек булачак. Аларны радистлар, парашютчылар, тәрҗемәчеләр, хәтта снайперлар итеп була. Танкка яки истребительгә үк утыртып куярга димим, әмма ир-егетләргә хезмәт итү бик җайлы булган урыннар да бар. Алар менә хатын-кызлар өчен бик әйбәт булачак», - дигән сүзләре белән килешергә кирәк.
Хатын-кызларны армиягә ала башлаганчы башкарасы эшләр дә шактый әле. Алар өчен аерым душ, бәдрәф, казармалар кирәк булачагын уйласаң гына да моның җиңел генә хәл ителә торган мәсьәлә түгеллеге аңлашыла.

Кызыклы яңалыкларны күзәтеп бару өчен Телеграм-каналга кушылыгыз.

#250