Телебезне вәкаләтле вәкил саклаячак

Әлеге программа ТР Фәннәр академиясе җитәкчелегендәге эшче төркем тарафыннан әзерләнгән. Төркемнең рәисе ТР Фәннәр академиясенең вице-президенты, Фәннәр академиясенең мөхбир-әгъзасы Җәүдәт Сөләйманов хәбәр итүенчә, хәзерге вакытта дәүләт программасы проекты өстендә эш бара. 1 апрельгә документ республиканың Министрлар Кабинетына кертелергә тиеш. Җ.Сөләйманов «Татар-информ» мәгълүмат агентлыгына биргән интервьюсында белдергәнчә, «Телләр буенча вәкиллек булдыру Татарстан уйлап тапкан әйбер түгел, Европа практикасы бар». Мондый институт оештыру идеясе барлыкка килгәндә, иң элек кеше хокуклары буенча вәкиллек институты тәҗрибәсе каралган. Җ.Сөләйманов әйтүенчә, телне саклау, кухня теленә әверелмәсен, милләтара аралашу теле булсын өчен аны үстерү мөһим. Бу дәүләт телләренә генә түгел, ә Татарстан территориясендә яшәүче башка халык телләренә дә кагылачак. Әгәр дә безнең тәкъдим хупланса, ТРда телләр буенча вәкаләтле вәкил вазифасы барлыкка киләчәк, бу исә прогресс, алга таба бер адым булачак, дип өсти Фәннәр академиясе вице-президенты.