Озак булсын, тик соңгысы булмасын

Приказ язып, кул куеп кына озынаймый бит әле ул, хәерсез. Үлемгә китерә торган сәбәпләр күп инде, алар һәркемгә мәгълүм. Юлдагы һәлакәтләр, мәсәлән.
Юлда хәвеф-хәтәр булмаган бер генә көн дә юк бит. Ни өчен бу шулай? Инде дәүләт нәрсәләр генә эшләп карамый: адым саен куелган камералар, штрафлар, машина йөртү хокукыннан мәхрүм итүләр... Тик юлдагы һәлакәтләр генә кимеми. Аның өчен, беренче чиратта, кешенең аң-фикерен төбе-тамырыннан үзгәртү кирәк. Ул юл йөрү кагыйдәләре эш юктан уйлап чыгарылмаган бит инде. Кагыйдә бар - димәк, аны үтисе! Алда сине камера күрәме-юкмы, ГИБДД хезмәткәре, каршыңа чыгып, штраф саламы-юкмы, анысы мөһим түгел. Кагыйдә буенча гына хәрәкәт ит! Үз гомерең өчен, тирә-юньдәгеләрнең гомере өчен. Адәм баласы менә шуны күңеленә салып, һәрдаим исендә тотып, хәрәкәт итсә, хәлләр уңай якка үзгәреш алыр иде.

Күз алдына китереп карыйк әле: машиналар юлда берсе артына берсе тагылып бармый - тиешле куркынычсызлык арасы саклана, руль артында кәрәзле телефоннан килгән юк-бар видео-рәсемнәрне карамый, юлда йөрү кагыйдәләрен төгәл үти, уң белән сулны, газ белән тормозны бутамый. Китердегезме?
Әни, әти машина белән чыгып киткәндә, гел бер сүзне кабатлый иде: “Карап кына йөр, гел булмый ул, бер була. Синең гаеп белән түгел, башкалар аркасында да килеп чыгарга мөмкин”. Үзе юл һәлакәтенә очраганнан соң, бик озаклап, авырлык белән генә аякка баскан әни, бик курка юлда йөрүдән. “Компьютер уенында гына бит ул гомер берничә: чабасың, бәреләсең, бераз вакыттан гомерең “яңара”, кабат куа башлыйсың машинада. Кеше гомер исә чынлыкта бер генә”, - ди әни гел.

Инде дәүләт кабат штрафларны кырыслатты. Чынбарлыкны уйлап, аңлап, кабул итеп, кагыйдәләр буенча йөри белмәгәннәрне, бәлки, акча белән акылга китереп булыр?!

Илүзә Шәрифуллина