Рөстәм Миңнеханов "Безнең ишегалды" программасы үтәлешен тикшерде

Бу хакта «Татар-информ»га ТР Президенты матбугат хезмәте җитәкчесе Лилия Галимова сөйләде.

«Татарстан Республикасы Президенты искәрткәнчә, катлаулы икътисади вазгыятькә карамастан, «Безнең ишегалды» программасы тулы күләмдә үтәлә. Татарстан Республикасы программаны тормышка ашыруга бюджеттан тыш акчалар тота. Биш ел эчендә планда каралган 6,7 мең ишегалды төзекләндереләчәк. Бу - 2014 елга кадәр төзелгән күп фатирлы йортларның ишегаллары», аларда ишегалларын ремонтлауда республиканың башка программалары буенча эш башкарылмаган, - диде Галимова.

Шамил Усманов урамындагы ишегалдында юлларга һәм тротуарларга асфальт түшәлгән, фонарьлар ремонтланган, эскәмияләр, чүп савытлары һәм балалар өчен уен җиһазлары урнаштырылган. Бу программада каралган мәҗбүри эшләр комплексы.

Ишегалды 316 кеше яши торган ике йортка карый. Рөстәм Миңнеханов масштаблы яңарту нәтиҗәсендә йорт яны территориясенең ничек үзгәрүен бәяләде. Программаны тормышка ашыру барышында биредә 427,6 квадрат метр асфальт өслеге һәм 324,6 квадрат метр тротуар ремонтланган. Тротуарларны җәяүлеләр һәм автомобильләр агымын бүлү өчен әйләндереп алганнар.

Төзекләндерү нәтиҗәсендә 28 машина урыны булдырылган. Моннан тыш, ишегалдында ике зонага бүленгән яңа уен мәйданчыгы урнаштырылган: алар өч яшьтән алып җиде яшькә кадәрге һәм җиде яшьтән алып 12 яшькә кадәрге балалар өчен.

чыганак: Татар-информ