Марат Әхмәтов: "Мин Конституциягә тәкъдим ителгән үзгәрешләрне ихластан хупладым"

Татарстан Дәүләт Советы Рәисе урынбасары Марат Әхмәтов парламентарийлар арасында беренчеләрдән булып Россия Конституциясен төзәтмәләр кертү буенча тавыш бирде.

Депутат Казан илкүләм тикшеренү технология университеты бинасында урнашкан тавыш бирү участогында булды. Кергәндә Марат Әхмәтовның температурасын үлчәделәр, тавыш бирү өчен бюллетень һәм бер тапкыр куллана торган ручка бирделәр. Шуннан соң ул тавыш бирү кабинасына юнәлде. Әлеге процедура контактсыз узды. Бюллетень алгач, Марат Әхмәтов сайлау комиссиясе әгъзасына паспортын ачып күрсәтте.

«1990нчы елларда Россия Конституциясе кабул иткәннән соң илебез бик җитди, катлаулы юл үтте. Әмма бүген икътисад, дәүләт строе, тормыш шартлары үзгәрешләр кертүне, шул исәптән илнең Төп законын үзгәртүне дә таләп итә», — диде парламентарий журналистларга.

Аның фикеренчә, хәзерге вакытта дәүләт халыкка социаль гарантияләр бирергә сәләтле. «Мәсәлән, керемнәр, яхшы картлык тәэмин итү буенча. Бүген дәүләт ил төзелешен һәм идарә итүне үзгәртү буенча шактый демократик үзгәрешләр әзерли», — диде Марат Әхмәтов.

Ул Россия Конституциясенә үзгәрешләр кертүне вакытлы, дип саный. «Мин Конституциягә тәкъдим ителгән үзгәрешләрне ихластан хупладым, чөнки Россия үсешенең алдагы чорында илнең Төп документында күбрәк социаль гарантияләр, икътисади үсеш өчен мөмкинлекләр салыначак. Өстәвенә, пандемия белән булган вазгыять тә көчле дәүләтнең үз кешеләрен кайгырта алуын, көчле икътисадның илебезнең чын держава булуын тәэмин итә алуын исбатлады», — диде ТР Дәүләт Советы Рәисе урынбасары. 

Бүген Россия төбәкләрендә, шул исәптән Татарстанда да Россия Конституциясенә төзәтмәләр кертү өчен тавыш бирү башланды. 1 июльгә кадәр тавыш биреп булачак. Татарстанда тавыш бирү өчен 65 территориаль һәм 2809 участок сайлау комиссиясе эшли. Моннан тыш республикада ачык һавада тавыш бирү өчен 370 мәйданчык та булдырылды.

Бүген шулай ук Татарстан Президенты Рөстәм Миңнеханов һәм Казан мэры Илсур Метшин да тавыш бирделәр.

Чыганак: Татар-информ