Иң яхшы якташлар җәмгыятен ачыкладылар

Әлеге бәйге быел икенче тапкыр уздырылды. Узган ел анда 13 якташлык җәмгыяте катнашса, быел 16 җәмгыять теләк белдергән.

Ассоциация рәисе Әгъзам Гобәйдуллин әйтүенчә, җиңүчеләрне билгеләгәндә якташлык җәмгыятьләренең эшчәнлеге, төрле социаль-мәдәни, спорт һәм җәмәгать чараларында, республика, россиякүләм һәм халыкара чараларда катнашулары, интернет киңлекләрендә сайтлары булу һәм аны ничек алып бару һәм башка күрсәткечләр искә алынган.
Шулай итеп, быел беренче урынга Буа якташлыгы җәмгыяте лаек дип табылган. Икенче урынны Актаныш белән Нурлат якташлыгы җәмгыяте бүлеште. Ә өченчегә Арча, Балык Бистәсе һәм «Чистай тамырлары» якташлыклары лаек дип табылган.

Бәйгедә җиңеп чыгучыларның бүләкләре дә саллы. Беренче урынга – 300 мең сум, икенче урынга – 200әр мең, өченче урын алган җәмгыятьләргә 100әр мең сум акчалата бүләк тапшырылды.
Буа якташлыгы җәмгыяте җитәкчесе Ирек Закиров әйтүенчә, җәмгыятьнең эшчәнлеге еллар дәвамында формалашкан.

– Беренчедән, без хәйрия эшләре белән актив шөгыльләнәбез. Ел саен Буа картлар йортына ярдәм итәбез. Анда, гадәттә, 150-200 мең сум акча тотыла. Әлеге җиңүгә бүләк итеп бирелгән акчаларны шунда тотарга дип уйлап торабыз. Мөмкинлекләребездән чыгып, мәчет, чиркәү төзелешләренә, ятим һәм авыру балаларга ярдәм итәргә тырышабыз. Узган ел әлеге эшләргә 560 мең сум акча сарыф ителгән иде. Үзебездән дә зур өлеш кертәбез, әлбәттә. Икенчедән, китаплар нәшер итү. «Буа ягым – тау ягым» исемле китап, «Буа энциклопедиясе»н чыгардык. Хәзерге вакытта Буа районыннан чыккан танылган шәхесләр турында китап әзерлибез, – диде ул.