Педагогларны яңадан әзерләүгә таләпләр арттырылган

Шикле онлайн-курслар төшереп калдырылачак. Бу хакта Россия Президенты Владимир Путин имзалаган канунда әйтелә.

Инициатива авторлары булып вице-спикер Петр Толстой җитәкчелегендәге депутатлар төркеме чыгыш ясаган. Дәүләт Думасы карарын шәрехләп, аның Рәисе Вячеслав Володин яңадан әзерләү турындагы дипломны интернетта гына сатып алырга мөмкинлеген юк итәргә дигән фикерне алга сөрә. Челтәр онлайн-курслар узу тәкъдимнәре белән тулган - хәтта квалификацияне 36 сәгать эчендә 1 мең сумнан күтәрү турында тәкъдимнәр дә бар, дигән Дәүләт Думасы Рәисе.

Ә тулаем алганда, 2023 ел мәгълүматлары буенча, педагогик хезмәткәрләрне яңадан укыту буенча хезмәтләрне 7 меңгә якын оешма башкарган, аларның 15 проценты уку яки фәнни үзәк статусына ия булмаган. "Кайбер мәктәпләрдә бер укытучы, интернетта шәхси фирмалардан сатып алынган документлар аркасында, берничә фән укыта", - дип билгеләгән спикер. Володин сүзләренчә, яңадан әзерләү тулы канлы булырга тиеш, формаль якын килүне булдырмаска кирәк.

Канун кабул ителү нәтиҗәсендә педагоглар әзерләү дәүләт һәм муниципаль мәгариф оешмаларында узарга тиеш. Гамәлгә куючылар сыйфатында шулай ук дәүләт корпорацияләре һәм дәүләт компанияләре дә рөхсәт ителә. Моннан тыш, педагогларны "Сириус" федераль территориясендә урнашкан мәгариф оешмаларында, "Сколково" инновацион үзәгендә һәм инновацион фәнни-технологик үзәкләр территорияләрендә укыта алачаклар.