“Эшмәкәр үзен дә туйдыра, башкаларга эш тә бирә”

Милләттәшләребез нинди генә бәлагә юлыкмасын, авыр хәлләргә калмасын, татар халкы һәм аның булдыклы, тырыш татар эшмәкәрләре иң беренчеләрдән булып ярдәм кулы суза. Махсус хәрби операциядә катнашучы ир-егетләр турында да онытмыйлар. Гуманитар ярдәм туплауда аларның да өлеше бик зур. XVII «Татарстанның эшлекле хезмәттәшләре» форумының пленар утырышында яңгыраган чыгышлар моның шулай икәнлеген кабат раслады. Россиянең 60 төбәгеннән, 13 чит илдән килгән 380 татар эшмәкәре чакырылган чарада Татарстан Рәисе Рөстәм Миңнеханов та катнашты.   

Татарстан Премьер-министры урынбасары, Бөтендөнья татар конгрессының Милли Шура рәисе Васил Шәйхразыев билгеләп узганча, быелгы су басу фаҗигасеннән зур зыян күргән Оренбург һәм Омск өлкәләре татар авылларына эшмәкәрләрләребез тарафыннан күпкырлы булышлык күрсәтелгән. 

Оренбург өлкәсе Төбәк татар милли-мәдәни мохтарияте рәисе, Оренбург өлкәсе Закон чыгару җыелышы депутаты Илдус Дәүләтов сүзләренчә, язын су басу аркасында 37 мең кеше, 14 мең йорт, 70 торак пункт зыян күргән.

– Бу вакыйга үзара бердәмлекнең нинди зур көч икәнен күрсәтте. Сезгә, Рөстәм Нургалиевич һәм барлык Татарстан халкына, Бөтендөнья татар конгрессына гуманитар ярдәм күрсәткәнегез өчен бик зур рәхмәт. Татар конгрессы ярдәме белән халыкка 12 тонна гуманитар йөк, 28 мең литр су таратылды. Шулай ук төрле төбәкләрдә яшәүче милләттәшләребез дә булышты. Мордовиядан «Солидарность» хәйрия фонды 2 миллион сумлык азык-төлек җибәрде. Самарадан Фәхретдин Канюкаев җитәкчелегендәге “Дуслык” оешмасы 1 миллион сумлык ярдәм күрсәтте. Әлмәт шәһәренең “Ак бүре” көрәш федерациясе шулай ук 1 миллион җибәрде. Өлкә халкы бу бәладә ялгыз булмавын, милләттәшләребезнең терәк булуын тойды, – диде ул.

Үзләренең дә илдә барган вакыйгаларга битараф калмавын һәм махсус хәрби операциядә катнашучыларга ярдәм итүен, аерым алганда машиналар, квадрокоптер, генераторлар, азык-төлек җыелмалары җибәрүләрен, госпитальдә яткан солдатлар өчен концертлар куюларын җиткерде.

Чыгышы ахырында Илдус Дәүләтов Татарстан Рәисе Рөстәм Миңнехановны киләсе срокка Рәис булып сайланырга кандидатурасын күрсәтүне сорады.

– Киләсе елга Татарстан халкы Рәисне сайлаячак, ә Татарстан Рәисе – бөтен татар халкының Рәисе ул. Рөстәм Нургалиевич, сездән башка татар дөньясын күз алдына китерә алмыйбыз. Форум делегатлары, Бөтендөнья татар конгрессы исеменнән алдагы сайлауда үзегезне тәкъдим итүне сорыйбыз, – диде ул.

“Омск өлкәсе Төбәк татар милли-мәдәни мохтарияте” иҗтимагый оешмасы Советы рәисе Радик Миңнеханов та Иртыш һәм Ишим елгасы ташуыннан соң зыян күргән татар авылы кешеләренә ярдәм күрсәтелүен ассызыклап үтте.

–  Су басуның беренче көннәреннән үк Татарстанның ярдәмен тойдык. Омск өлкәсенең федераль Гадәттән тыш хәл зонасына 120 тонна гуманитар йөк килде. Каракүл авылындагы янган йортлар төзекләндерелде. Шулай ук Большеречье районында моңа кадәр булмаган мөселман зираты өчен җир бүленеп, төзекләндерү эшләре башкарылды. Иртыш һәм Ишим елгасы ташуыннан зыян күргән алты татар авылына 10 миллион сумнан артык ярдәм күрсәтелде. Республика халкына рәхмәтебезне җиткерәбез, – диде ул. 

Үзбәкстанның кейтеринг хезмәте күрсәтү предприятиеләре ассоциациясе рәисе Илсур Гайфуллин Үзбәкстанда 540 меңгә якын татар яшәвен билгеләп үтте. 

– Татарлар бездә бик актив эш алып бара. Мәдәни тормышыбыз да бик бай. Сабантуй иң зур бәйрәмнәрнең берсе санала. Ул шулкадәр популяр, Бәйсезлек көненнән һәм Нәүрүздән кала өченче урында тора. Татарстан белән Үзбәкстанның бик күп бизнес-проектлары бар. Без Татарстанда – Үзбәкстан, ә анда Татарстан бизнесменнарының активлыгына шатбыз. Безнең президентлар очрашып, бер-берсенә елмайганда, барлык татарлар да елмаядыр, – диде ул.

Илсур Гайфуллин Үзбәкстанда яшәүче татарлар турында фильм чыгарылачагын да хәбәр итте. 

Пермь крае Барда районыннна килгән «Таттранском» җәмгыяте директоры Ильяс Гыймадетдинов, Татарстанда сокланырлык, үрнәк алырлык эшләр бихисап күп дип, шуларга таянып эшчәнлек алып баруларын сөйләде. 

Биш бертуган оештырган үз җәмгыятьләре исә 500 кешене эшле итә. Аларның 80 проценты – татарлар. Шуңа күрә үз оешмаларын “Татарлар транспорт компаниясе” дип атаганнар. 

– Махсус хәрби операциядәгеләргә һәрдаим гуманитар ярдәм күрсәтелеп тора. Кече ватаныңа ярдәм итү хәйриячелек акциясе түгел, ә туган төбәгеңнең киләчәгенә өлеш кертү. Авыл белән тыгыз элемтәдә яшибез, юлларны, зират коймаларын төзекләндерүдә, янгын сүндерү техникасын яңартуда булышабыз, шулай ук мәдәни, массакүләм спорт чараларын оештырабыз, чараларда җиңүчеләрне һәм катнашучыларны бүләклибез. Шулай ук мәчетләргә финанс яктан, төзекләндерүдә, чаралар оештыруда булышабыз, – диде ул.

Татарстан Рәисе Рөстәм Миңнеханов, пленар утырышта катнашучыларга мөрәҗәгать итеп, хезмәтегез белән милләтебезне көчле итүгә зур өлеш кертәсез, дип белдерде. 

– Эшмәкәр ул – һөнәрле кеше, үз-үзен дә туйдыра, башкаларга эш тә бирә. Без сезгә таянып эшлибез Татарстанда татарларның бер өлеше генә яши, башка илләрдә, Россия төбәкләрендә дә татарлар бик күп. Һәммәгезгә хезмәтегез, безнең белән бергә булганыгыз өчен зур рәхмәт. Безнең бурыч – милләтне, динне, телне саклау. Бизнесларыгыз уңай булсын. Киләчәктә матур итеп эшләргә насыйп булсын, – диде ул.