Сезгә нинди яр кирәк?

Кияүдә түгел һәм 25 яше якын арада тулачак туташ буларак, бу тема миңа да кызыклы. Хәтерләсәгез, күптән түгел генә «Кайчан кияүгә чыгасың?» дигән кечкенә генә язмам да басылган иде. Ул язманы интернетта урнаштырганнан соң, тормыш тәҗрибәсе зур булган абзый-апалардан миңа шактый гына киңәшләр дә килеп иреште. Кайсы: «ашыкма әле, өлгерерсең», - ди. Икенче берәүләр бу сорауга ни рәвешле җавап кайтарырга өйрәтә.

Ялгызлык хисен күбрәк хатын-кызлар кичерә, дигән фикер белән мин һич тә килешә алмыйм. Бу ир-егетләргә дә хас. Тик алар бит «көчле зат», шуңа да үзләренең йомшаклыгын күрсәтмәскә тырыша, һәрхәлдә, кешеләргә моны сиздерми. Чынлыкта исә теләсә кайсы ир-ат гаилә җылысы, балалар хакында хыяллана.

Хәзерге заман яшьләренең иң зур хатасы, минемчә, таләпләр зурлыгында. Кызларга бай, фатирлы һәм машиналы егет кирәксә, егетләрнең 80 проценты диярлек Дженнифер Лопес фигуралы кыз хакында хыяллана. Тик Дженнифер дөньяда берәү генә, ә бай егетләр урта хәлле яки үзләреннән түбәнрәк социаль статуслы кызларга игътибар итми диярлек. Шунысы да бар, бөтен кызларга да бай егетләр җитмәячәк.

Ышанасызмы, юкмы, егетләр белән танышканда, беренче сорау исемең ничек түгел, ә «праваң бармы?». Моны мин үз тәҗрибәмнән чыгып язам. Әгәр бу сорауга уңай җавап яңгырамый икән, фатир үзеңнекеме, әллә «снимать» итәсеңме булачак. Бу сорауга да җавап тискәре икән - егетне бары тышкы кыяфәт белән генә җәлеп итү мөмкинлеге кала. Юк инде, син нәрсә, хатын-кызның акыллы, тәрбияле, башлы булуы да мөһим, дияр кайберәүләр! Төкерәләр синең ничә дипломың булуга, ул дипломнарның төсенә һәм башлылыгыңа! Киресенчә, кыз акыллырак булган саен, егетләр аңардан күбрәк «курка». Мин моны иптәш кызларымнан чыгып әйтәм. Бик чая, белемле, тәрбияле һәм искиткеч башлы, ярдәмчел иптәш кызым 30 яшькә якынлашса да, ЗАГСка ашыкмый, дәшүче дә юк. Чөнки «аңгырарак» хатын белән тору ир кешегә дә кулайрак, күрәсең. Ә акыллы хатын күбрәк таләп итә...

Мин язмышка һәм Ходайга ышана торган кеше. Әмма Ходайга ялварып утырудан гына файда юк. Тырышлык, үз дигәнеңә ирешү, дөрес максатлар кую - уңышның нигезе шулдыр.
Кайбер очракта артыгын тырышып ташлау да ярамый. Мисал өчен, минем бик яхшы таныш егетем бар. Ул белемле, тырыш, тәрбияле, эшчән, максатчан, акча таба белә торган, үз эшен алып бара алучы, аңа 30 яшь һәм ул өйләнмәгән! Иң мөһимен онытканмын, аның бик тә гаиләле буласы килә! Яшь барган саен, әти-әнисе, туганнары «Кайчан өйләнәсең?» дигән сорауны ешрак яудыра. Үзе дә, мин гаилә өчен өлгереп җиттем, дип саный. Әмма... күңеленә хуш килерлек кызны таба алмый. Йә алар бик тыйнак һәм аның өчен күңелсез (танышым бик күп укый һәм үзаңын үстерү өстендә шөгыльләнә) яисә ул кызларга ошамый. Гаилә кору темасына соңгы арада без аның белән еш аралаша башладык. «Минем кайсы җирем җитешсез? Хатын-кызга тагын ни җитми? Мин аларны кинога да алып барам, чәчәкләр дә бүләк итәм, игътибарымны да кызганмыйм... Әмма алар йә суга төшкән кебек юк була, яисә бөтенләй очрашудан баш тарта», - ди танышым. Чыннан да без хатын-кызларга, машина һәм фатирдан кала, ир-аттан нәрсә кирәк?

Шәхсән мин егетләрнең фикерләү сәләте һәм эшчәнлегенә, ата-­аналары белән булган мөнәсәбәтләренә, тәрбиялелегенә карыйм. Татар халкы, юкка гына: «Ирне ир иткән дә - хатын, чир иткән дә - хатын», - димәгәндер. Егет уйлый, фикерли белсә, кулыннан эш килсә, ныклы тәрбия алган булса - тиешле юнәлешкә кертеп җибәрү бераз гына тырышлык һәм түземлек кенә сорый кызлардан. Уртак тапкан мал кадерлерәк тә була әле.

Егетләргә килгәндә, аларга да тәрбияле, тырыш һәм кыйммәтле машина һәм шәһәр үзәгендә фатир турында хыялланудан тыш башка нәрсәләргә дә сәләтле баш миенә ия булган кызны сайларга киңәш итәр идем.
Ә иң мөһиме - мәхәббәт һәм бер-береңә хөрмәт булсын!

РS. Әгәр дә минем танышым тәртипле, акыллы һәм гаилә корырга теләге булган кайсы да булса кызны кызыксындырган икән, «Вконтакте» аша минем белән элемтәгә керсен иде.